Udhëtarët që hyjnë në Bashkimin Evropian mund të përballen me pritje më të gjata në kufi, pasi më 6 sht...
KOSOVA
Tragjedi në Kosovë, gjendet e pajetë gruaja shtatzënë në lumin e Bardhë
PiranjatPërditësimi i fundit 7 Dhjetor 2025, 18:34
Grupi i kërkimit në fshatin Grabanicë të Klinës ka gjetur këtë të dielë, më 7 dhjetor, trupin e pajetë të një gruaje, e cila mbrëmjen e kaluar ishte raportuar nga familjarët si e zhdukur. Zëdhënësi i Policisë për rajonin e Pejës, Fadil Gashi, konfirmoi për mediat se trupi u gjet rreth orës 13:15 në lumin e Bardhë, afër urës së fshatit, pas kërkimeve të intensifikuara nga njësitë policore.
“Mbrëmë rreth orës 19:00, familjarët raportuan se viktima ishte larguar nga shtëpia dhe nuk gjendej. Rasti ishte iniciuar si ‘person i zhdukur’. Sot gjatë kërkimeve, trupi i pajetë u gjet rreth një kilometër larg urës së fshatit,” tha Gashi për gazetën Telegraf. Ndërkohë mediat lokale shkruajnë se gruaja ishte shtatzënë.
Mjeku ka konstatuar vdekjen në vendngjarje, ndërsa hetuesit policorë dhe prokurori i shtetit kanë kryer procedurat e para hetimore. Me urdhër të prokurorit, trupi i viktimës është dërguar në Institutin e Mjekësisë Ligjore për obduksion, me qëllim të sqarimit të rrethanave të vdekjes.
Prokuroria e Pejës, përmes zëdhënësit Shkodran Nikçi, bëri me dije se në vendin e ngjarjes kanë marrë pjesë edhe njësiti i zjarrfikësve për të ndihmuar në nxjerrjen e trupit dhe se policia ka marrë autorizim për të kryer të gjitha veprimet hetimore për të zbardhur plotësisht rrethanat e ngjarjes.
“Një i pajetë u gjend në Lumbardh. Veç prokurores e policisë, në vendin e ngjarjes kanë dalë edhe njësiti i zjarrfikësave që e ka bërë tërheqjen e trupit. Me urdhër të Prokurorit të Shtetit, trupi u dërgua në IML. Kurse, policia ka marrë autorizimin nga prokurori për t’u kryer të gjitha veprimet hetimore që të ndriçohen rrethanat e rastit”, tha Nikçi.
Policia vazhdon hetimet për zbardhjen e plotë të rastit dhe për të përcaktuar shkaqet e vdekjes.
