George Desmond Kamurasi mund të kalojë së shpejti nga dorezat e portierit te një kurorë mbretërore. Kapiteni 36-vjeçar i ...
KOSOVA
Vrasja me eksploziv në Gjakovë/ Gjykata urdhëron nxjerrjen e bisedave në Facebook mes viktimës dhe të akuzuarit
PiranjatPërditësimi i fundit 17 Dhjetor 2025, 17:26
Gjykata Themelore në Gjakovë ka marrë sot një vendim të rëndësishëm procedural në rastin e vrasjes me eksploziv të Haxhi Ahmetit.
Në seancën e mbajtur sot, trupi gjykues ka aprovuar kërkesën e përfaqësuesit të palës së dëmtuar për sigurimin e komunikimeve elektronike, konkretisht bisedave në rrjetin social Facebook mes viktimës Haxhi Ahmeti dhe të akuzuarit kryesor në këtë rast, Dod Gjikolli.
Sipas aktvendimit të siguruar nga Insajderi, gjykata ka obliguar që këto të dhëna të sigurohen përmes bashkëpunimit juridik ndërkombëtar, pasi serverët e Facebook-ut ndodhen jashtë vendit. Gjykata ka kërkuar që komunikimet të nxirren për periudhën kohore relevante, duke përfshirë adresat elektronike dhe çdo të dhënë tjetër që mund të ndihmojë në zbardhjen e rrethanave të rastit.
Po ashtu, gjykata ka aprovuar edhe dërgimin për ekspertizë të disa incizimeve video, të cilat do të analizohen nga Byroja Shtetërore për Hetime (BSH), ose përmes mekanizmave të bashkëpunimit ndërkombëtar, përfshirë edhe Ambasadën e Shteteve të Bashkuara të Amerikës, nëse shihet e nevojshme.
Seanca e sotme është ndërprerë dhe vazhdimi i shqyrtimit gjyqësor është caktuar për datën 16 shkurt 2026, në ora 09:30.
Aktvendimet e plota:
“Miratohet propozimi i prokurores së shtetit dhe me pajtimin e palëve në procedurë bëhet leximi i dëshmisë së ekspertes së AKF-së Shpresa Gashi Fejza. Miratohet propozimi i prokurores së shtetit dhe mbrojtjes që të bëhet leximi i dëshmive të dëshmitarëve të dhëna pranë kësaj gjykate Luigj Shenja, Lule Lleshaj, Pashk Brahimaj dhe Gasper Smajlaj.
Miratohet propozimi i mbrojtjes që të ftohet si dëshmitar për tu dëgjuar Admir Selgjekaj (mbrojtja detyrohet që të njëjtin ta njoftojë për seancën në të cilën do të procedohet, meqenëse i njëjti është shtetas i Republikës së Shqipërisë). Miratohet propozimi i përfaqësuesit të palëve të dëmtuara av.
Prek Kola që ka të bëjë me komunikimin në rrjetin social Facebook për periudhën kohore të vitit 2018 lidhur me adresat “Kunora Park”, “Duaje vendlindjen”, “Mirëdita Dod”, dhe Elton Gjikola, ku Gjykata do të kërkojë nga selia e facebookut e cila gjendet në Irlandë sa i përket rajonit të Evropës që të sigurohen këto komunikime për periudhën e lartcekur, kjo do të bëhet nëpërmjet Bashkëpunimit Juridik Ndërkombëtar.
Miratohet propozimi i përfaqësuesit të palëve të dëmtuara av. Prek Kola që video incizimi i ngjarjes-DVR të dërgohet për ekspertizë në SHBA, ku gjykata me aktvendim të posaçëm do ti caktojë të gjitha detyrat si dhe të merr parasysh kërkesën e mbrojtjes sipas propozimit, e kjo do të bëhet nëpërmjet Bashkëpunimit Juridik Ndërkombëtar apo nëpërmjet Ambasadës së Amerikës.”, thuhet ne vendimin e gjykates.
