Ambasadori i Gjermanisë në Shqipëri, Karl Bergner i kujton kryeministrit Rama se në rrugën për integrimin në B...
KOSOVA
Zgjedhjet e 28 dhjetorit në Kosovë, KQZ nis pakot me fletët e votimit drejt shteteve ku jetojnë zgjedhës të regjistruar
PiranjatPërditësimi i fundit 14 Dhjetor 2025, 15:08
Komisioni Qendror i Zgjedhjeve në Kosovë nisi të dielën dërgimin e pakove me fletët e votimit për zgjedhësit jashtë territorit, që janë regjistruar për të votuar përmes postës në zgjedhjet e parakohshme parlamentare të 28 dhjetorit.
Janë rreth 58 mijë zgjedhës që kanë zgjedhur këtë metodë votimi që përmbyllet në datën 27 dhjetor, ditë në të cilën 19 257 shtetas të tjerë të Kosovës që jetojnë jashtë vendit do të paraqiten për të votuar në përfaqësitë diplomatike të Kosovës në vendet ku jetojnë.
“Në çdo dërgesë postare, është vendosur nga një numër i veçantë gjurmimi dhe u është dërguar votuesve të regjistruar, të cilët mund të shohin vazhdimisht vendndodhjen e pakos me fletëvotim”, tha Zëdhënësi i KQZ Valmir Elezi.
Ai shpjegoi se fletët e votimit u printuan në Slloveni dhe mbërritën në Kosovë të premten.
“Votimi përmes postës përfundon më 27 dhjetor 2025. Kjo periudhë votimi vlen vetëm për rreth 58 mijë votuesit e regjistruar jashtë Kosovës dhe që kanë përzgjedhur të votojnë përmes postës. KQZ u bën thirrje votuesve që të mos presin ditën e fundit për ta dërguar pakon e tyre me fletëvotim. Pakot duhet të dorëzohen në adresën e njërës nga kutitë postare të KQZ-së në shtetin ku jetojnë votuesit, apo në kutitë postare më të afërta. Votuesit inkurajohen që këtë ta bëjnë sa më shpejt që është e mundur, në mënyrë që pakoja të arrijë me kohë në kutinë postare nga ku do të tërhiqet dhe do të dërgohet në Kosovë për procesin e numërimit”, theksoi ai.
KQZ ndërkohë ka njoftuar shtetasit që janë regjistruar për votim përmes postës se kutitë postare janë funksionale Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kosovë, Kroaci, Mali i Zi, Maqedonia e Veriut, Mbretëria e Bashkuar, Norvegji, ShBA, Shqipëri, Slloveni, Suedi, Turqi dhe Zvicër.
