Revolta kundër ndërtimeve në Zvërnec nuk është kufizuar vetëm brenda Shqipërisë. Dje dhe sot, shqiptarë që...
LIFESTYLE
Ushqimet që shërbejnë si “karburant” për kujtesën e ato që e “dobësojnë” atë…
PiranjatPërditësimi i fundit 8 Maj 2026, 14:56
Një stil jetese i shëndetshëm nuk lidhet vetëm me një trup fit, por shumë më tepër se aq. Studimet tregojnë se të moshuarit që ushqehen mirë dhe janë fizikisht aktivë shpesh kanë kujtesë më të fortë sesa të rinjtë me stil jetese sedentare, të lidhur me ushqimin e shpejtë dhe përdorimin e tepruar të teknologjisë.
Sipas ekspertëve, harresa nuk lidhet domosdoshmërisht me moshën, por më tepër me stilin tonë të jetesës. Aktiviteti fizik dhe një dietë e balancuar janë faktorë kryesor për të përmirësuar përqendrimin, për të lehtësuar të nxënit dhe për të ruajtur një kujtesë të shëndetshme në çdo moshë.
Ushqimet që “forcojnë” kujtesën tonë
Një regjim i pasur me perime të freskëta, fruta dhe drithëra siguron lëndë ushqyese të domosdoshme për funksionin e trurit:
Perimet me gjethe jeshile, drithërat dhe kikirikët janë burim i mirë i acidit folik, i cili mbështet shëndetin e qelizave të trurit dhe qarkullimin e gjakut.
Lakra, lulelakra dhe soja përmbajnë kolinë, një substancë thelbësore për funksionimin e neuroneve dhe proceset e të mësuarit.
Frutat si kajsitë, pjeshkët dhe ftuat janë të pasura me beta-karoten, që ndihmon në përmirësimin e funksioneve njohëse.
Bimët dhe çajrat që “stimulojnë” përqendrimin
Përveç ushqimit, disa bimë mjekësore mund të ndihmojnë në përmirësimin e kujtesës dhe fokusit:
Rigon i egër: përdoret si çaj për të stimuluar qarkullimin dhe përqendrimin. Rozmarina: mund të përdoret si çaj, vaj esencial apo edhe në banjë, duke ndihmuar në stimulimin e trurit.
Trumza dhe kopra: të njohura për efektet e tyre pozitive në funksionet mendore.
Gjithashtu, çajrat e përgatitur nga gjethet e frutave si kajsia, pjeshka dhe ftua, si dhe çaji nga lëvorja e mollës, përmbajnë vitamina dhe minerale që mbështesin aktivitetin e trurit.
Ç’duhet të shmangni për një trup sa më të shëndetshëm
Për të ruajtur një kujtesë të mirë, është e rëndësishme të kufizoni:
Ushqimet e yndyrshme dhe të përpunuara
Konsumin e tepërt të kafesë
Në vend të tyre, rekomandohet zgjedhja e ushqimeve të freskëta, me proteina dhe konsumimi i çajrave natyralë.
Përdorimi i tepruar i pajisjeve digjitale po ndikon në mënyrën se si truri përpunon dhe ruan informacionin. Mbështetja e vazhdueshme tek telefonat dhe kompjuterët ka bërë që njerëzit të mbajnë mend më pak të dhëna, duke dobësuar aftësinë për të dalluar informacionin e rëndësishëm.
Kujtesa e mirë nuk është vetëm çështje moshe, por rezultat i një kombinimi të stilit të jetesës, ushqyerjes dhe kujdesit për shëndetin mendor. Duke zgjedhur ushqimet e duhura dhe duke shmangur zakonet e dëmshme, secili mund të përmirësojë ndjeshëm përqendrimin dhe kapacitetin e të nxënit dhe mbajtur në kohë.
