Presidenti i Shteteve të Bashkuara, Donald Trump, ka deklaruar se është “absurde” që Uashingtoni të vazhdojë të...
LIFESTYLE
VIDEO/ Propozimi i pazakontë në 1,454 metra lartësi çon çiftin në pranga. Mesazhi që lanë mbi ndërtesën më të lartë në SHBA
PiranjatPërditësimi i fundit 1 Korrik 2026, 22:40
Një çift është arrestuar pasi u ngjit në ndërtesën Empire State Building në New York City dhe varën një flamur nga maja e strukturës 1,454 metra të lartë.
Një burrë dhe një grua u ngjitën në pikën ikonike të Manhattanit pak pas orës 12:00 të mërkurën, ku burri më vonë u ul në një gju dhe i propozoi për martesë. Flamuri që dyshja vendosi në majë të ndërtesës Empire State Building mbante mbishkrimin: "Kur fuqia e dashurisë të mposhtë dashurinë për pushtet, bota do ta njohë paqen."
Kjo thënie i është atribuar shpesh gabimisht kitaristit legjendar Jimi Hendrix, por në fakt është thënë nga William Gladstone, një politikan britanik i shekullit XIX. Ende nuk është e qartë se si dy personat arritën të ngjiteshin deri në majën e antenës së ndërtesës.
Dyshohet se bëhet fjalë për Angela Nikolau dhe Ivan Beerkus, një çift rus i njohur për ngjitjet e tyre në struktura shumë të larta në vende të ndryshme të botës, përfshirë Chicago, San Francisco dhe Meksikë. Dyshja realizoi edhe një dokumentar me Netflix, të titulluar "Skywalkers: A Love Story", ku rrëfejnë pasionin e tyre për t'u futur fshehurazi në rrokaqiej dhe për t'i ngjitur ato pa përdorur pajisje alpinizmi apo mjete sigurie.
Angela Nikolau dhe Ivan Beerkus, të veshur me të zeza dhe me maska, qëndruan rreth 40 minuta në majën e Empire State Building, përpara se të zbrisnin. Ata u panë të ulur në një platformë të ngushtë të ndërtesës, ku Beerkus u ul në një gju, duke i propozuar martesë partneres së tij. Më vonë, Nikolau konfirmoi fejesën me një postim në Instagram, ku publikoi momentin kur Beerkus i bëri propozimin, si edhe një fotografi të unazës së fejesës, me panoramën e Manhattan-it në sfond.
Pak minuta më vonë në vendngjarje mbërritën efektivët e Policisë së Nju Jorkut (NYPD), ndërsa disa ekipe shpëtimi u panë duke u ngjitur në ndërtesë. Policia njoftoi qytetarët se, për shkak të operacionit, do të kishte bllokime të përkohshme të qarkullimit pranë Fifth Avenue dhe 34th Street. Rreth orës 13:00, zyrtarët e NYPD-së u panë duke i shoqëruar të dy zbritjen me shkallë nga ndërtesa. Më pas, ata u morën në paraburgim për t'u marrë në pyetje. /PiranjatNews/
