Protestuesit kanë mbërritur tashmë përpara Kryemninistrisë, pasi më herët ishin tek Ministria e Arsimit. Ata u dëbuan ...
POLITIKE
BE bllokoi integrimin e Shqipërisë, Rama e mohon: Lufta politike nuk mund të ndalojë përparimin
PiranjatPërditësimi i fundit 5 Prill 2026, 10:02
Kryeministri Edi Rama në podkastin “Flasim” foli për procesin e brendshëm të Partisë Socialiste për zgjedhjen e drejtuesve të organizatave në të gjithë Shqipërinë.
Ai tha se kjo nuk është vetëm një fushatë organizimi, por edhe një mënyrë për të komunikuar me qytetarët dhe për t’u dhënë informacion të drejtpërdrejtë.
Rama theksoi se në kohën e sotme është e vështirë të kuptohet e vërteta, pasi shumë gjëra përçohen përmes gjysmë të vërtetave dhe gënjeshtrave, shpesh për të krijuar një imazh negativ për punët e vendit.
Ai shtoi se, megjithëse Shqipëria ka probleme dhe shumë punë për të bërë, gjithçka po ecën dhe vendi po punon për zhvillimin e tij.
Në lidhje me anëtarësimin në Bashkimin Europian, Rama sqaroi se negociatat nuk janë bllokuar siç pretendojnë disa, por vazhdojnë normalisht dhe së shpejti priten lajme të mira për procesin e hapjes së kapitujve të ri.
FJALA E PLOTË E KRYEMINISTRIT:
Jemi përfshirë në një proces, në një fushatë të brendshme në Partinë Socialiste, për të zgjedhur ata që do të jenë drejtuesit e organizatave tona në të gjithë territorin e Shqipërisë, që nga niveli i qendrës së votimit, në nivelin e njësisë administrative dhe në nivelin e bashkisë. Por, në ndërkohë, kjo ka rëndësi për këto shënime, sepse nuk është thjesht një fushatë e brendshme organizimi dhe energjizimi, por është edhe një fushatë komunikimi mes nesh dhe mes nesh dhe të gjithë atyre që na mbështesin, që na besojnë apo që kanë dëshirë dhe nevojë të na dëgjojnë dhe që t’i dëgjojmë, pasi jetojmë në një kohë kur bëhet gjithmonë më e vështirë për të mësuar të vërtetën apo për të marrë informacionin e drejtpërdrejtë lidhur me një fakt që të intereson. E kundërta ndodh! Je menjëherë i përmbytur nga gjysmë të vërteta, që janë edhe gënjeshtrat më të mëdha, nga gënjeshtra safi, që i thonë fjalë nga sajesa e fabrikime, dhe nga komente gjithfarësh, që në fund të ditës më shumë e mjegullojnë sesa ndihmojnë në kërkimin e të vërtetës, dhe thuhen nga të tëra, dëgjohen nga të tëra, por ajo që është më shqetësuesja, për sa më takon dhe për sa na takon, është se nuk flitet, nuk komunikohet e nuk diskutohet për punët e Shqipërisë. Po përkundrazi, punët e Shqipërisë identifikohen vetëm me një luftë mizerabël politike dhe me një përpjekje të vazhdueshme të kujtdo që është në anën e kundërt me ne, që qeverisim Shqipërinë, për të bërë çmos që punët e Shqipërisë të mbulohen me ziftin e dëshpërimit të tyre, me baltën e të gjithë urrejtjes, mllefit, inateve të tyre. Shqipëria ka probleme, patjetër. Ne kemi shumë punë për të bërë, pa dyshim; jo çdo punë e kemi bërë si duhet dhe sa duhet, kjo nuk ka diskutim, por ama Shqipëria punon dhe punët e Shqipërisë, në tërësi, janë në vijë. Ashtu si kundër, dhe e mbyll këtë shënim, është në vijë procesi më i rëndësishëm historik i anëtarësimit në Bashkimin Europian, me negociatat që vazhdojnë dhe, në ndërkohë, gjithçka që thuhet kur vjen puna te negociatat lidhet me gënjeshtrën e madhe se: “ato janë bllokuar”, “ato janë ndaluar”, “ato janë penguar”, për arsye të mosarsyes së të gjithë atyre që synojnë ta pengojnë Shqipërinë për të luftuar qeverinë. E vërteta e thjeshtë është se kjo punë e madhe e Shqipërisë vazhdon përditë e përditë e përditë dhe, së shpejti, përsëri, siç kemi pasur në procesin e hapjes së kapitujve, do të kemi lajme shumë të mira për të gjithë.
