Prokuroria e Tiranës ka regjistruar vetëm tre procedime penale lidhur me dëmtimet e shkaktuara protestuesve gjatë javës së fundit,...
POLITIKE
Djegia e karrigeve nga opozita dhe kaosi në Kuvend, Rama: Shenjë revolte kundër një vendimi gjykate, ne ndërtojmë dhe ata djegin
r.llPërditësimi i fundit 30 Shtator 2024, 20:14
edi rama
TIRANË- Kryeministri Edi Rama ka komentuar nga selia e Partisë Socialiste kaosin në seancën e sotme plenare dhe djegien e karrigeve të deputetëve nga ana e opozitës.
Sapo mori fjalën në takimin për “Deputeti që duam”, Rama tha se i kishte ardhur një foto nga zjarri i ndezur jashtë Kuvendit me karriget e deputetëve, sipas tij në shenjë revolte ndaj një vendimi gjykate.
Teksa po fliste për politikën, kryeministri tha se siç ka fuqinë të shërojë përmes proceseve dhe vullnetit, politika ka fuqinë djallëzore të plagosë dhe të dërrmojë. Sipas kësaj, Rama bëri dhe ndasinë e tij në politikën shqiptare.
"Duke ardhur përpara sesa të dëgjoja fjalët tuaja më dërgoi dikush këtë fotografi. Ky është një zjarr. Një zjarr i ndezur me karriget e deputetëve të zgjedhur në Kuvendin e Shqipërisë për tu ulur në ato karrige dhe për të përfaqësuar ata që i cojnë atje, në shenjë revolte ndaj një vendimi gjykate. Pse e solla këtu këtë imazh? E solla sepse dua të them pak fjalë për politikën, e cila prej shumë kohësh në Shqipëri dhe vende të zhvilluara kalon ditë jo të mira në perceptim publik. Është një mjet që i ka bërë gjëra jashtëzakonisht të mëdha në historinë e njerëzimit, por ka bërë edhe katastrofa jashtëzakonisht të mëdha.
Refuzimi i politikës apriori si diçka e keqe, e piste, si diçka që më e mira është të mos ngatërrohesh është foshnjarak. Është e pamundur që ta vendosësh ti se çfarë politika bën apo nuk bën me ty. Ti mund të vendosësh vetëm sesa ti mund ta ndikosh politikën duke u marrë me te. Në rast se ti i kthen kurrizin dhe refuzon të merresh me të, ajo ka gjithë pushtetin që të merret me ty. Cdo gjë jashtë dyerve të shtëpisë në ndërveprimet tona mes njerëzish lidhet me politikën dhe vendimet e saj.
BE-në e ka krijuar politika, politika ka krijuar gjithë ato gjëra që sot konsiderohen arritjet e njerëzimit si liritë, të drejtat e njeriut, të institucioneve që mbështesin veprimtarinë shoqërore. Pa politikë s’ka shtet, pa shtet është xhungël Siç ka fuqinë të ndërtojë, ka fuqinë edhe të shkatërrojë. Siç ka fuqinë të shërojë përmes proceseve dhe vullneti, politika ka fuqinë djallëzore të plagosë, dërrmojë sakatojë. Mes këtyre dy pamjeve, jo absolute, qëndron edhe ndarja këtu tek ne, mes nesh, që përpiqemi të ndërtojmë, shërojmë, mbjellim dhe atyre që nga ana tjetër shkatërrojmë, plagosin, shkulin, djegin. Duke qenë kështu, Shqipëria ka humbur shumë kohë, nëse reforma që ne i kemi ndërmarrë pothuajse 25 vjet pas fillimit të të jetuarit tonë në liri, të ishin ndërmarrë jo 25 vjet më mbrapa, por 10, 15 edhe 20 sot do ishim shumë më para.", tha Rama.
Në sallën e seancave plenare është rikthyer ditën e sotme aksioni opozitar, kaosi dhe tensioni. Ashtu siç u paralajmërua menjëherë pas dënimit dhe burgosjes së kolegut të tyre Ervin Salianjit, deputetët e Partisë Demokratike kanë penguar zhvillimin normal të seancës së sotme plenare. Në hapje të seancës nga kryetarja e Kuvendit, Elisa Spiropali deputetët demokratë u mblodhën rreth foltores, ndërsa pjesa ku ulen ministrat u rrethua nga punonjësit e Gardës. Ndërkohë teksa Spiropali po lexonte vendimin për heqjen e mandatit të Salianjit, deputetët e opozitës nxorrën jashtë karriget e tyre dhe iu vunë flakën. Kreu i grupit të PD-së, Gazment Bardhi tha se janë aty jo për karriget e tyre por për të mbrojtur interesin publik. Ai shtoi se nuk kanë djegur mandatet, pasi nuk shmangen nga beteja e tyre.
