Qytetarë, ambientalistë dhe aktivistë të shoqërisë civile janë mbledhur këtë mbrëmje në Tiranë p&e...
POLITIKE
''Ekonomia e rrënuar''/ Tabaku: Zv/kryeministrja që jepte fonde e tenderë korruptivë duhet të dorëhiqej dhe të mos ishte në detyrë!
PiranjatPërditësimi i fundit 4 Dhjetor 2025, 12:18
Deputetja e Partisë Demokratike, Joirida Tabaku, tha se rritja ekonomike prej 4% që është prezantuar për ekonominë shqiptare nuk është reale, sepse në të vërtetë Shqipëria nuk prodhon asgjë dhe mbahet artificialisht.
Dhe për ta argumentuar solli një sërë shembujsh, ku akuzoi qeverisjen si të korruptuar, duke iu referuar edhe rastit më të freskët të zv/kryeministres Belinda Balluku.
Ligjvënësja demokrate nënvizoi se edhe pse jepte fonde ndërtimi dhe tenderë abuzivë dhe korruptivë, Belinda Balluku nuk është dorëhequr ende dhe qëndron në detyrë. Madje Tabaku akuzoi edhe ish-ministrin në arrati, Arben Ahmetaj, se nuk pranoi që të ndihmonte fermerët dhe bujqit kur ishte në detyrë, duke zbatuar skema të tjera ekonomike.
“Dikur një ish-ministër Financash, sot i arratisur, vendosi të mos ndihmojë fermerët. Bujqësia sot është e fundosur, të dëmtuarit nga tërmeti i 26 nëntorit 2019 ende nuk janë shpërblyer. Humbjet janë të pandalshme të kësaj qeverisje me koncesionet dhe rrugët e florinjta. Çmimet janë rritur, taksat më të larta në rajon, një braktisje e qëllimshme e jo neglizhencë. Janë ngritur monopole me ligje nga ky parlament, me kode të patronazhit politik. Fonde të dhëna nga zv/kryeministrja që sot duhet të ishte dorëhequr dhe nuk duhet të ishte në detyrë”, tha deputetja demokrate mes të tjerash.
Nga foltorja e Kuvendit, Tabaku kujtoi se ky nuk është modeli ekonomik që e çon Shqipërinë 2030 në BE, por në rrënim total, ku gjithçka ndahet te një grup njerëzish të pushtetit.
“Ky nuk është modeli ekonomik i një vendi që kërkon Evropën, por modeli i një qeverie monopol që kërkon të mbajë gjithçka. Shqipëria 2030 është i korruptuar deri në thelb dhe i pangopshëm, ku torta e pushtetit ndahet për një grup njerëzish”, vijoi ligjvënësja opozitare.
Në fund, Tabaku tha se rritja ekonomike 4% ishte një realitet fals, pasi jo vetëm gëlon korrupsioni, por edhe vendi nuk prodhon asgjë, por mbahet artificialisht.
“Kjo qeveri ka frikë nga njerëzit e punës. Ka frikë nga njeriu që kërkon dinjitet dhe të protestojë. Edhe pse prezanton një rritje 4%, ekonomia shqiptare mbahet në jetë artificialisht. Niveli më i ulët ekonomik që nga viti 1996, më e ulëta që nga 2013”, u shpreh deputetja e PD.
