Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
POLITIKE
Fjalimi i Ramës, Veliaj tradhëtari dyfish, miu helmues, apo drejtuesi i pafajshëm për vartësit?
I.APërditësimi i fundit 7 Maj 2024, 18:27
Edi Rama dhe Erion Veliaj
Kryeministri Edi Rama gjatë fjalës së tij rreth 120 minuta në mbledhjen e jashtëzakonshme që thirri përçoi disa mesazhe drejt bashkëpunëtorëve të tij, mes të cilëve dhe kryebashkiaku Erion Veliaj. Tashmë është fakt që marrëdhëniet e tyre nuk janë ndër raportet më të mira që kanë pasur. Por veprimet e fundit të Ramës kanë lënë të nënkuptuar që ai ka hequr dorë nga mbrojtja e këtij të fundit.
Edhe pse është vetë Rama që i ka vendosur këta njerëz në poste kyçe në qeverinë e tij, sot duket se shënjestra e fjalimit të tij ishte pikërisht Erion Veliaj, kryebashkiaku i Tiranës. Veliaj disa ditë më parë u paraqitë në SPAK më fletëkërkesën e prokurorëve të Prokurorisë së Posaçme, ku u mor në pyetje për rreth 7 orë në lidhje me aferën e Inceneratorit të Tiranës. Por ky nuk është shqetësimi i vetëm i Veliajt, pasi 5 drejtorë e drejtoresha të tij ndodhen në pranga për vjedhje dhe korrupsion me tenderat e bashkisë Tiranë.
Duke folur me nënkuptime por dhe me përbuzje, Rama gjatë fjalimit theksoi se ai kryebashkiak që fut duart në arkat e shtetit dhe në xhepat e popullit meriton të quhet parazit dhe tradhëtar. Por aktualisht i vetmi kryebashkiak që është i përfolur dhe i denoncuar për korrupsion e vjedhje është Veliaj.
“Ashtu sikur dikush që është zgjedhur në krye të një bashkie, nëse fut duart në arkat e këtij shteti dhe xhepat e këtij populli, nuk është me ne. Nuk ka se si të jetë ne dhe as se si të kërkojë gjë tjetër nga ne përveç përbuzjes. E thënë ndryshe, çdo anëtar i kësaj familjeje politike që bën korrupsionin në funksionet publike është një tradhtar i dyfishtë, jo vetëm i popullit shqiptar si çdo hajdut me kostum që merr çfarë nuk është e tij, por edhe i PS-së si çdo parazit që ushqehet me gjakun e trupit ku rritet”, u shpreh Rama.
Po ashtu në një tjetër moment, Rama ia bëri të qartë se ai nuk ka për t'i dalë në mbrojtje askujt, kur bëhet fjala për vjedhje dhe korrupsion. Po ashtu kryeministri la të nënkuptuar se mund të ketë shkarkime nga detyra për personat në fjalë që thirren para drejtësisë.
“Unë nuk lëshoj vetëm djalin e vogël në ndonjë shkëmb mbi det kur do të hidhet. Por nuk mbaj asnjë burrë me para të vjedhura në karrige kur vjen ora të thirret. Jo po nuk kam bërë asgjë, po më bien në qafë," tha Rama.
Po këtu, në këtë rast Rama përmendi dhe drejtorët e Bashkisë Tiranë që ndodhen pas hekurave. Ai u përqendrua te fakti se qeveria dhe PS-ja nuk kanë për t'i dalë në mbrojtje asnjë drejtori bashkie apo kryebashkiaku, që ka çështje të hapura në SPAK. Por u bëri thirrje atyre, në një tjetër nënkuptim për Veliajn se duhet që të luftojë për të vërtetën e vetë.
"Nëse nuk ke bërë asgjë nuk të mbaj as unë as PS, por e vërteta. Prandaj lufto për të vërtetën tënde. Sepse kjo parti dhe kjo qeveri nuk bëjnë asnjë koment për çështjet që hap SPAK. Jo më avokatin e një drejtori, kryebashkiaku, ministri, deputeti apo ish ministri,” tha Rama.
Në të gjithë fjalimin e Ramës, pika kryesore ishte korrupsioni që ka prekur qeveritë që ai ka drejtuar, por si çdo herë, kryeministri i ka mëshuar fjalës se përgjegjësitë para ligjit janë personale. Të njëjtën fjalë, Rama e ka përmendur dhe ditën e sotme në mesazhet e nënkuptuara që ia ka drejtuar Veliajt apo drejtorëve të tij që ndodhen në burg./Dosja.al
