Në fjalën e saj në Kuvend Ina Zhupa ka mbajtur një qëndrim të ashpër ndaj qeverisë Rama.
Zhupa theksoi se ësht&e...
POLITIKE
"Krimi i organizuar duhet luftuar atje ku i dhemb më shumë!" Ambasadori italian: Mbështesim drejtësinë, në veçanti SPAK!
M.B.Përditësimi i fundit 26 Nëntor 2024, 14:31
TIRANA- Ambasadori i Italisë në Shqipëri, Fabrizio Bucci tha sot, në fjalën e tij në Konferencën e përbashkët të Policisë së Shtetit me Guardia di Finanza, për luftën kundër kultivimit të bimëve narkotike, se vendi i tij mbështet plotësisht të gjithë sektorin e drejtësisë shqiptare, në mënyrë të veçantë për SPAK.
Bucci theksoi se mbështetja italiane është e gjerë dhe mbulon çdo sektor, nga lufta ndaj krimit të organizuar, tek korrupsioni dhe trafikimi i lëndëve narkotike. Ai tha se, fushata e mbikëqyrjes nga ajri ka arritur në edicionin e 13-të dhe është një përsosmëri, jo vetëm për rajonin e Ballkanit.
Gjithashtu ai përmendi aktivitetet e formimit të specializuar të kryera nga Policia e Shtetit, Guardia di Financa dhe Arma dei Carabinieri për hetuesit e BKH-së. Bucci gjithashtu përmendi praninë e katër magjistratëve italianë që punojnë në mbështetje të drejtësisë shqiptare.
Pjesë nga fjala e ambasadorit:
Rezultatet që prezantuam sot në luftën ndaj fenomenit të kultivimit të kanabisit në Shqipëri, janë të rëndësishme dhe kanë rendësi të veçantë. Bashkëpunimi policor në luftën ndaj krimit të organizuar dhe trafikimi të lëndëve narkotike ka një rol të veçantë në interes të përbashkët të Italisë dhe Shqipërisë. Mbështetja jonë e plotë dhe e bindur shkon për të gjithë sektorin e drejtësisë shqiptare, magjistratëve shqiptarë. Në mënyrë të veçantë mbështetja jonë shkon për SPAK-un.
Gjatë viteve roli i Italisë në Shqipëri është rritur dhe është pajisur me mjete të rëndësishme falë të cilës kemi promovuar nisma të mrekullueshme dhe kemi arritur rezultate. Janë aktualisht 15 skuadra të përbashkëta mes Shqipërisë dhe Italisë. 60 persona në kërkim janë ndaluar së fundmi dhe 40 ekstradime janë realizuar. Më shumë se 10 kurse të zhvillua nga Ministria e Brendshme italiane në favor të policisë shqiptare, në bazë të marrëveshjes së nënshkruar në 2023-shin nga dy drejtuesit e policisë italiane dhe shqiptare për mbështetjen ndaj formimit arsimor.
Ne kemi bërë shumë, por duhet çuar përpara ky bashkëpunim duke forcuar më tej luftën ndaj çdo forme kriminaliteti, sepse nuk ka alternativë tjetër. Duhet të bashkëpunojmë. Krimi i organizuar di të operojë në nivel global, është i shpejtë dhe ne duhet të lëvizim me të njëjtin efikasitet, me të njëjtin fleksibilitet të kriminelëve.
Krimi i organizuar duhet luftuar atje ku i dhemb më shumë, atje ku janë paratë dhe fuqia financiare dhe ky është një mësim që na i kanë dhënë magjistratët tanë, Falcone dhe Borselino më shumë se 30 vite më parë”.
Vendosmëria jonë për të punuar bashkë me autoritetet shqiptare vijon dhe nuk do të mungojë asnjëherë në luftën kundër krimit të organizuar, korrupsionit, paligjshmërisë. Italia e di që mund të mbështetet tek Shqipëria sot, dhe akoma më shumë në të ardhmen.
