Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
POLITIKE
Abuzimi me fondet e kulturës në Bashkinë Tiranë, pas denoncimit vjen dorëheqja e drejtoreshës (emri)
PiranjatPërditësimi i fundit 29 Tetor 2025, 21:52
Presidenti i Sindikatës së Pavarur të Artit, Kulturës dhe Medias të Shqipërisë, z. Julian Kazazi, ku shfaq në emisionin e mëngjesit në Syri.tv ku u trajtuan publikisht denoncime për shpërdorim detyre dhe abuzime me fondet në institucionet e artit, përfshirë edhe Cirkun Kombëtar, vetëm pak orë më pas zhvillimet morën një kthesë të papritur në Bashkinë e Tiranës.
Në emision, Kazazi përmendi se po përgatitet një dosje e re hetimore pranë SPAK që lidhet me projektet e programit “Youth” dhe me mënyrën si janë administruar fondet gjatë periudhës kur znj. Jehona Varfi ishte përgjegjëse për dosjet e projekteve. Ai paralajmëroi se “këto çështje nuk do të mbeten pa u hetuar” dhe kërkoi transparencë të plotë mbi mënyrën si janë shpërndarë fondet publike në emër të të rinjve dhe artit.
Vetëm një ditë pas këtij denoncimi publik, burime nga Bashkia e Tiranës konfirmuan dorëheqjen e Drejtoreshës së Përgjithshme të Promovimit të Qytetit, znj. Mirela Koçollari, një emër i njohur në strukturat e bashkisë për menaxhimin e projekteve të kulturës dhe turizmit edhe e përfshirë në Dosjen 5D. Sipas burimeve, dorëheqja ka ardhur pak para një vendimmarrjeje të mundshme për shkarkim, në kuadër të riorganizimeve të fundit që po ndodhin në institucion pas zhvillimeve të ditëve të fundit.
Znj. Koçollari, e cila më parë ka mbajtur poste si Drejtoreshë e Turizmit dhe më vonë Drejtoreshë e Promovimit të Qytetit, është përmendur disa herë në raportime mediatike për mosrregullsi në menaxhimin e fondeve kulturore dhe klientelizëm në përzgjedhjen e projekteve. Gjatë viteve të fundit, Drejtoria që ajo drejtonte ka pasur në dispozicion buxhete që shkonin deri në 400–500 milionë lekë të reja në vit, të cilat shpërndaheshin për aktivitete kulturore, promovuese dhe evente publike në Tiranë.
Artistë dhe organizata të shumta kanë raportuar ndër vite vështirësi të vazhdueshme për të përfituar fonde publike, duke akuzuar drejtues të Bashkisë për përzgjedhje selektive dhe “favorizime të subjekteve të caktuara” që përfitonin disa herë në vit, shpesh me projekte të cilësisë së ulët, por me mbështetje financiare të lartë.
Në disa raste, stafi i bashkisë është angazhuar për realizimin e këtyre eventeve, ndërsa pagesat për realizimin shkonin në llogari të subjekteve të lidhura, çka ka ngritur dyshime të forta mbi mënyrën e përdorimit të buxheteve publike.
Sipas të njëjtave burime, një pjesë e dosjeve të Drejtorisë së Promovimit të Qytetit janë tashmë në shqyrtim nga SPAK, përfshirë edhe projektet e viteve të fundit të Paradës “Rrënjët Kuq e Zi” që zhvillohet çdo 28 Nëntor në bashkëpunim me kompani private. Hetimet janë përqendruar mbi mënyrën e përzgjedhjes së kontraktorëve dhe përdorimin e fondeve për realizimin e eventeve.
Znj. Koçollari ka qenë gjithashtu anëtare e bordit përzgjedhës të projekteve të “Vitit të Rinisë Youth”, një program kombëtar që u zhvillua disa vite më parë në bashkëpunim me Bashkinë e Tiranës dhe ku, sipas të dhënave të publikuara në media, rreth 70% e projekteve të miratuara nuk kanë marrë ende pagesat përfundimtare, pavarësisht kalimit të afateve. Sipas burimeve pranë institucioneve, rreth 500 milionë lekë të reja janë zhdukur pa gjurmë nga skema e financimeve, çka e ka bërë këtë dosje objekt hetimi për organet e SPAK-ut.
Dorëheqja e saj shihet nga shumë aktorë të fushës si një sinjal i parë pozitiv drejt pastrimit dhe reformimit të administratës kulturore të Bashkisë së Tiranës, e cila prej vitesh është kritikuar për mungesë transparence dhe përqendrim të fondeve në duart e një grupi të vogël njerëzish.
Në një reagim të shkurtër pas emisionit, Presidenti i Sindikatës së Artit, Kulturës dhe Medias, Julian Kazazi, deklaroi:
“Kjo është vetëm maja e ajsbergut. Arti dhe kultura janë pasuri publike dhe nuk mund të jenë pronë private e disa individëve që përdorin fondet e qytetarëve për interesa personale apo politike. Do të ndjekim çdo rast deri në fund, për të rikthyer dinjitetin dhe integritetin e institucioneve artistike.”
