Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
POLITIKE
Ish-zyrtari i Pentagonit: Nga puna ime në Uashington dhe vizitat jashtë vendit, kam zbuluar se emri i Yuri Kim ka dalë shpesh në kontekste jopozitive
r.llPërditësimi i fundit 24 Janar 2025, 20:46
michael rubin
TIRANË- Analisti dhe ish-zyrtari i Pentagonit, Michael Rubin ka folur ditën e sotme lidhur me shkrimin e tij për zgjedhjet e presidentit Donald Trump për ambasadorë, ndër të cilat përmendet edhe ish-ambasadorja amerikane në Shqipëri, Yuri Kim.
Në një lidhje live me Syri Tv, Rubin tha se gjatë kërkimeve për analizat politike amerikane, i është dashur të zhvillojë takime me diplomatë brenda dhe jashtë SHBA-së. Ai u shpreh se gjatë këtyre bisedave, shpeshherë emri i Yuri Kim ka dalë në kontekste të ndryshme jopozitive.
Michael Rubin: Si pjesë e punës sime, unë shpenzoj shumë kohë jashtë vendit, veçanërisht në Mesdheun Lindor, por gjithashtu shpenzoj kohë edhe në vende të tjera, si në Kore, Tajvan dhe Azi. Gjatë diskutimeve të mia dhe kërkimeve që bëj në këto zona, unë takohem me diplomatë amerikanë. Si amerikan që jam, nuk jam pjesë e qeverisë amerikane, megjithatë, nuk bëj vetëm një bisedë të thjeshtë informale, por mund të bëj edhe një diskutim informal duke pirë një birrë dhe duke folur për çfarë po ndodh.
Kam shumë miq nga universiteti, të cilët janë diplomatë amerikanë. Ata janë pak a shumë në të njëjtën moshë si Yuri Kim dhe kemi miq të përbashkët. Kështu, si analist i politikave në Uashington DC, përpiqem gjithashtu të kuptoj se çfarë po ndodh në Departamentin e Shtetit dhe sesi këto mund të ndikojnë tek politikat amerikane, sepse kur bëhet fjalë për politikën e jashtme, ka dy anë: është ana amerikane dhe është gjithashtu ajo palë tjetër, apo ajo anë tjetër me të cilën përfshihen amerikanët.
Ajo që më ka habitur gjatë periudhës që kam punuar në Uashington, por edhe gjatë udhëtimeve në Mesdheun Lindor dhe në Oqeanin Paqësor, ka qenë se emri Yuri Kim ka dalë në kontekste nga më të ndryshmet. Shumë shpesh ato nuk kanë qenë pozitive. Pika e fundit që dua të them është se pasi Yuri Kim ishte larguar nga Shqipëria, pikërisht në atë moment, nuk dija të gjitha hollësitë e periudhës së saj kur ajo kishte qenë ambasadore këtu.
Më pas, Yuri Kim doli në faqet e para të gazetave, ku kishte dhënë dëshminë e saj para Kongresit, përpara pushtimit të Azerbajxhanit nga Nagorni Karabak, dhe ajo qëndroi atje para Komitetit të Marrëdhënieve me Jashtë të Senatit, që merret me politikën e jashtme dhe është përfaqësuesi më i lartë. Ajo tha se nën asnjë rrethanë nuk do të lejonim spastrimin etnik të Nagorni Karabakut. Pas 4 vitesh, Azerbajxhani bëri një spastrimin etnik të Nagorni Karabakut dhe njerëzit po shikonin Yuri Kim dhe po thonin se si ka mundur të gabojë kaq rëndë.
