Personi në foto, efektivi i ‘Shqiponjave’ Edison Adri, i cili mbeti i plagosur gjatë operacionit policor të zhvilluar në zon&e...
POLITIKE
"Kërkohet qeveri teknike që të çojë vendin në zgjedhje", REL: Bllokohen rrugët në Shqipëri gjatë protestës së opozitës!
n.fPërditësimi i fundit 29 Tetor 2024, 22:44
Protesta
TIRANË- Deputetë dhe mbështetës të partive opozitare në Shqipëri, Partisë Demokratike dhe Partisë së Lirisë, kanë protestuar të martën, duke bllokuar gjashtë prej kryqëzimeve kryesore në disa qytete të vendit për gati tri orë. Një ndër kryqëzimet ku u bllokua qarkullimi i automjeteve ishte dhe ai ku është arrestuar ish-presidenti i Shqipërisë, Ilir Meta, më 21 tetor.
Përmes aksionit të mosbindjes civile, të shpallur nga opozita para një muaji, kërkohet që një Qeveri teknike të çojë vendin në zgjedhje, por edhe lirimi i Sali Berishës, i cili mbahet në arrest shtëpiak nën dyshimet për korrupsion. Bllokimi i kryqëzimit kryesor në hyrje të Tiranës u shoqërua edhe me përplasje fizike, pasi deputetë demokratë dhe protestues shtynë zyrtarë të policisë, me pretendimin se po provokoheshin prej tyre, për shkak të pranisë së lartë të zyrtarëve policorë.
Policia u kujtoi protestuesve se bllokimi i rrugëve përbën vepër penale. Policia i orientoi drejtuesit e automjeteve të lëviznin në rrugë alternative. Protestuesit u vunë flakën disa gomave të makinave në Tiranë, Elbasan, Durrës, Milot dhe Fier. Në secilin prej gjashtë kryqëzimeve ishin të pranishëm deputetë të Partisë Demokratike. Sekretari i Përgjithshëm i Partisë Demokratike, Flamur Noka tha pas tre orësh protestë se ‘nuk ka kthim pas’.
“Rezistenca jonë do të vijojë, mosbindja civile do të sjellë zgjidhje për vendin. Qeveria teknike është e vetmja zgjidhje”, tha Noka.
Ndërsa Sekretari i Përgjithshëm i Partisë së Lirisë, që drejtohet nga Ilir Meta, tha se ish-presidenti u rrëmbye, si dhe sulmoi prokurorët duke i quajtur ‘mercenarë e vrasës me pagesë të opozitarizmit.’
Përfaqësues të të dyja partive në opozitë pretendojnë se hetimet ndaj Berishës dhe Metës nuk lidhen me afera korruptive, por me "skenarë për të goditur opozitën para zgjedhjeve të vitit 2025". Aksioni i opozitës ka nisur që pas arrestimit të deputetit demokrat, Ervin Salianji dhe dënimit të tij me një vit burg për "kallëzim të rremë", në fund të shtatorit.
Kjo u pasua me djegien e ulëseve të deputetëve demokratë para Kuvendit si dhe me përplasje fizike mes deputetëve dhe pjesëtarëve të Gardës, që garantojnë sigurinë në Kuvend. Shtetet e Bashkuara dhe Bashkimi Evropian kanë shprehur shqetësim dhe keqardhje për skenat që u panë më 30 shtator në Kuvendin e Shqipërisë, dhe i kanë bërë thirrje pushtetit dhe opozitës që të zhvillojnë dialog./ REL
