Është hequr gardhi metalik që ishte vendosur para Kuvendit të Shqipërisë si barrikadë për të penguar protestë...
POLITIKE
Kurti pret në takim ambasadorin gjerman, bisedojnë për proceset zgjedhore në Kosovë dhe në Gjermani
E.DPërditësimi i fundit 27 Shkurt 2025, 17:45
KOSOVË- Kryeministri i Kosovës, Albin Kurti, është takuar me ambasadorin e Gjermanisë në Kosovë, Jorn Rohde, me të cilin ka diskutuar për zgjedhjet parlamentare të 9 shkurtit. Në një komunikatë për media, ambasadori gjerman ka theksuar nevojën për krijimin sa më të shpejtë të institucioneve.
“Në takim u diskutua për proceset zgjedhore, që së fundmi u mbajtën në Kosovë dhe në Gjermani, për rëndësinë e formimit të institucioneve të dala nga zgjedhjet respektive dhe të vazhdimit të bashkëpunimit Kosovë-Gjermani e thellimit të marrëdhënieve bilaterale ndërmjet dy vendeve”, thuhet në njoftim.
Të mërkurën Komisioni Qendror i Zgjedhjeve (KQZ) ka nisur numërimin e votave të diasporës. Zgjedhjet parlamentare të këtij viti u mbajtën me 9 shkurt, ku partia e parë doli Lëvizja Vetëvendosje me 40.83 për qind.
Pas LVV-së radhitet Partia Demokratike e Kosovës me 22.15 për qind, dhe në vendin e tretë është Lidhja Demokratike e Kosovës me 17.59 për qind. Gjithashtu më 23 shkurt, Gjermania mbajti zgjedhjet për një parlament të ri. Liderët e koalicionit CDU/CSU, Friedrich Merz dhe Markus Söder, siguruan fitoren duke u renditur në vendin e parë në zgjedhjet federale.
