Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
POLITIKE
"Një këllirë, zero lidhje me fshatin!" Resuli i përgjigjet Braçes: Për të ardhur keq që deputeti ka zgjedhur të ndërhyjë me gjuhë ofenduese ndaj një qëndrimi profesional
M.B.Përditësimi i fundit 23 Dhjetor 2024, 13:27
TIRANA- Kreu i Shoqatës për Mbrojtjen e Konsumatorit dhe Prodhuesit, Ervin Resuli i është përgjigjur nëpërmjet rrjeteve sociale deputetit socialist Erion Braçe deklaroi se Resuli nuk kishte lidhje me fshatin. Deklarata e Braçes vjen pas deklaratave të Resulit për produktet ushqimore.
Vetë Resuli ka shpjeguar në nisje të postimit të tij bazën e tij profesionale dhe shkencore. Ai thotë se është udhëhequr gjithmonë nga parimet e mbrojtjes së shëndetit publik dhe mirëqenies së qytetarëve, pa ndonjë prapavijë të errët apo interes të fshehur.
Resuli thotë se është për të ardhur keq që Braçe, si deputet i Kuvendit të Shqipërisë, ka zgjedhur të ndërhyjë me gjuhë ofenduese ndaj një qëndrimi profesional që lidhej me prani të klorpirifosit në mandarina. Ai shton se çështja e klorpirifosit nuk është një spekulim, por një shqetësim real, i ngritur mbi baza shkencore dhe të raportuar edhe në sistemin ndërkombëtar RASFF.
POSTIMI:
I detyruar të reagoj ndaj qëndrimeve joetike të një të zgjedhuri nga vota e popullit, i cili është në detyrë për t’i shërbyer interesave të qytetarëve që e kanë votuar, ndjej të nevojshme të rikthehem te baza ime profesionale dhe shkencore. Gjithë veprimtaria ime publike dhe jo publike është ndërtuar mbi aftësitë profesionale, njohuritë shkencore dhe raportimet konkrete në sistemin europian të alarmit për ushqimet dhe ushqimin e kafshëve (RASFF). Jam udhëhequr gjithmonë nga parimet e mbrojtjes së shëndetit publik dhe mirëqenies së qytetarëve, pa ndonjë prapavijë të errët apo interes të fshehur.
Çdo qëndrim i imi është bërë mbi bazën e fakteve dhe provave shkencore, duke pasur si prioritet të vetëm mbrojtjen e shëndetit të konsumatorëve dhe të fëmijëve tanë. Është për të ardhur keq që z. Brace, si deputet i Kuvendit të Shqipërisë, ka zgjedhur të ndërhyjë me gjuhë ofenduese ndaj një qëndrimi profesional që lidhej me prani të klorpirifosit në mandarina. Në vend që të kontribuonte në debat me të dhëna dhe argumente, ai ka zgjedhur rrugën e sulmeve personale, duke tentuar të më tërheqë në një debat të ulët politik. Dua të jem i qartë: nuk kam aspak ndërmend të merrem me llumin e politikës ku z. Brace pretendon të jetë profesionist. Për mua, e vetmja gjë e rëndësishme mbetet shëndeti i konsumatorëve shqiptarë dhe e ardhmja e fëmijëve tanë.
Çështja e klorpirifosit nuk është një spekulim, por një shqetësim real, i ngritur mbi baza shkencore dhe të raportuar edhe në sistemin ndërkombëtar RASFF. Kjo është një temë që kërkon trajtim profesional, dhe jo përdorim politik për qëllime personale apo mediatike. I bëj thirrje z. Brace dhe kujtdo tjetër që ka përgjegjësi publike, të fokusohet në përmirësimin e mekanizmave të kontrollit të sigurisë ushqimore dhe mbrojtjen e konsumatorit, në vend që të sulmojë profesionistët që përpiqen të bëjnë punën e tyre me përgjegjësi dhe përkushtim. Gjithçka që kërkoj është një debat i hapur dhe transparent mbi çështjet e sigurisë ushqimore, i bazuar në fakte dhe të dhëna, jo në retorikë dhe sulme personale. Shëndeti i qytetarëve shqiptarë është më i rëndësishëm se çdo interes i ngushtë politik.
