Një shpërthim me lëndë të dyshuar plasëse është regjistruar në orët e para të mëngjesit të so...
POLITIKE
PD: KLSH kërkon largimin e Sekretarit të Përgjithshëm të Ministrisë së Arsimit, pse nuk e dorëzon Manastirliu, Erzen Tolën?
M.B.Përditësimi i fundit 1 Shkurt 2025, 10:48
TIRANA- Zëdhënësja e Antikorrupsionit në PD, Genta Vangjeli ka dhënë sot një deklaratë për mediat ku tha se ministrja e Arsimit dhe Sportit, Ogerta Manastirliu sapo mori detyrën me anë të Urdhrit Nr. 523, datë 15 shtator 2023, i delegoi Sekretarit të Përgjithshëm, Erzen Tola, kompetencat e saj. Vangjeli tha se Sekretari i Përgjithshëm, përveç të ardhurave nga paga, sigurohet të marrë edhe nja 10 mijë euro pagesa për honorare dhe pjesëmarrja në borde apo këshilla drejtues konkretisht nga Qendra Shqiptare për Popullsinë dhe Zhvillimin, Agjencia e Sigurimit të Cilësisë në Arsimin Parauniversitar, Ministria e Arsimit dhe Sportit dhe Universiteti i Tiranës.
Sipas Vangjelit, gradimi në detyrë i sekretarit të përgjithshëm u krye edhe pas bëmave të këtij të fundit ku përmendim denoncimin lidhur me një universitet të pa akredituar, që si pasojë kishte lënë pa matrikulluar studentët pavarësisht se ata paguan 7 mijë Euro për vit akademik. Vangjeli thotë se përgjigja epike e Tolajt kur ai u pyet për këtë shqetësim ishte se mars nuk kishte mekanizma kontrolli, pasi ky rast kish të bënte me një marrëdhënie kontraktuale midis studentit dhe universitetit.
Ajo shton se së fundmi sipas mediave, Kontrolli i Lartë i Shtetit ka dhënë masën disiplinore largim nga shërbimi civil të Sekretarit të Përgjithshëm së MARS, Erzen Tola si pasojë e shkeljeve të rënda gjatë ushtrimit të detyrës nga ana e tij. Zëdhënësja e PD-së thotë se Manastirliu refuzon të zbatojë sanksionet e vendosura nga (KLSH) .
"Ministrja që nuk dihet tamam çfarë pune bën meqenëse ka deleguar kompetencat nëpër vartësit e saj, edhe pse ndodhet në Shqipëri, dhe gëzon shëndet të plotë për të ushtruar detyrën e ngarkuar nga ligji dhe pranuar nga vetë ajo, nën shembullin e Edi Ramës, i ‘mban peng’ vartësit e kapur në shkelje për ti përdorur më pas si ‘mish për top’ në zbatimin e urdhrave antiligjorë e duke përjashtuar veten nga firma", tha Vangjeli.
Deklarata e zëdhënëses së Antikorrupsionit në PD, Genta Vangjeli:
Ogerta Manastirliu, ministrja e kallëzuar në Spak, e cila propozonte dhe kryeministri miratonte, blerjen e letrës higjienike me procedura të konsideruara si ‘sekret shtetëror’, sapo mori detyrën si Ministre Arsimi, me anë të Urdhrit Nr. 523, datë 15 shtator 2023, i delegoi Sekretarit të Përgjithshëm, Erzen Tola, kompetencat e saj.
Nga ana tjetër, super Sekretari i Përgjithshëm, përveç të ardhurave nga paga, sigurohet të marrë edhe nja 10 mijë euro pagesa për honorare dhe pjesëmarrja në borde apo këshilla drejtues konkretisht nga:
-Qendra Shqiptare për Popullsinë dhe Zhvillimin,
-Agjencia e Sigurimit të Cilësisë në Arsimin Parauniversitar,
-Ministria e Arsimit dhe Sportit,
-dhe Universiteti i Tiranës.
Gradimi në detyrë i super sekretarit të përgjithshëm u krye edhe pas bëmave të këtij të fundit ku përmendim:
-denoncimin e emisionit investigativ ‘Stop’ lidhur me një universitet të pa akredituar, që si pasojë kishte lënë pa matrikulluar studentët pavarësisht se ata paguan 7 mijë Euro për vit akademik.
Përgjigja epike e Tolajt kur ai u pyet për këtë shqetësim ishte se MARS nuk kishte mekanizma kontrolli, pasi ky rast kish të bënte me një marrëdhënie kontraktuale midis studentit dhe universitetit.
-denoncimin tjetër, nga presidenti i Federatës Shqiptare të ‘Kick & Thai Boxing’ për mbivendosjen e një tjetër federate në aktivitetet e saj (Federatës Shqiptare e ‘Kick Boxing), duke akuzuar drejtpërdrejt Ministrinë e Arsimit dhe Sportit (MAS) dhe denoncuar Erzen Tolën si përgjegjësin kryesor të këtij grupi korruptiv dhe të strukturuar në MARS.
Gjithashtu, dëshmia në prokurori e drejtorit të projekteve i cili deklaroi se ka marrë porosi me e-mail nga Sekretari i Përgjithshëm, Erzen Tola, ku i kërkohej që ‘të vlerësohet me prioritet’ zbatimi i porosisë së të vetëprezantuarës si ‘mbesa e Edi Ramës’, duke tërhequr nga hunda me një email gjithë sistemin arsimor.
Së fundmi sipas mediave, Kontrolli i Lartë i Shtetit (KLSH) ka dhënë masën disiplinore largim nga shërbimi civil të Sekretarit të Përgjithshëm së MARS, Erzen Tola si pasojë e shkeljeve të rënda gjatë ushtrimit të detyrës nga ana e tij.
Mirëpo ministrja e kallëzuar në SPAK, refuzon të zbatojë sanksionet e vendosura nga (KLSH) .
Natyrshëm lind pyetja …përse refuzon?
Natyrshëm vjen dhe përgjigja…
Ministrja që nuk dihet tamam çfarë pune bën meqenëse ka deleguar kompetencat nëpër vartësit e saj, edhe pse ndodhet në Shqipëri, dhe gëzon shëndet të plotë për të ushtruar detyrën e ngarkuar nga ligji dhe pranuar nga vetë ajo, nën shembullin e Edi Ramës, i ‘mban peng’ vartësit e kapur në shkelje për ti përdorur më pas si ‘mish për top’ në zbatimin e urdhrave antiligjorë e duke përjashtuar veten nga firma.
