Situata përpara Ministrisë së Arsimit ka përshkallëzuar sërish në përplasje të dhunshme fizike mes efektivëv...
POLITIKE
Policia vijon shoqërimet, protestuesit paralajmërojnë qëndresë deri në orët e vona
PiranjatPërditësimi i fundit 13 Tetor 2026, 21:32
Policia ka vijuar shoqërimin e protestuesve gjatë tubimit në Tiranë, ndërsa numri i studentëve dhe qytetarëve të ndaluar është rritur. Efektivë të Forcave të Ndërhyrjes së Shpejtë dhe të njësisë “Shqiponja” kanë ndërhyrë në zonën e Pazarit të Ri, ku janë raportuar shoqërime të tjera.
Protesta, e nisur në orën 14:00 pranë Ministrisë së Arsimit, ka vijuar për më shumë se shtatë orë, duke u zhvendosur në disa zona të kryeqytetit. Lëvizjet e protestuesve nuk kanë ndjekur një itinerar të përcaktuar, ndërsa në rrugë të ndryshme janë regjistruar djegie të koshave të mbeturinave dhe dëmtime të bizneseve, semaforëve e infrastrukturës publike.
Pas rreth katër orësh përplasjesh me policinë në Rrugën e Durrësit, një grup protestuesish hyri në ambientet e Bashkisë së Tiranës, teksa u raportua thyerje xhamash dhe hedhje flakadanësh.
Më pas, protesta u zhvendos në zonën e “9-katësheve”, në Rrugën e Barrikadave dhe te Pazari i Ri, ku tensionet kanë vijuar.
Pavarësisht ndërhyrjeve të policisë, protestuesit kanë vazhduar brohorimat dhe thirrjet për dorëheqjen e kryeministrit Edi Rama. Ata janë shprehur se do të qëndrojnë në rrugë deri në orët e vona të natës, duke paralajmëruar vijimin e protestës.
Ndërkohë, sipas raportimeve paraprake, rreth 40 persona janë shoqëruar nga policia gjatë protestës në Tiranë, ndërsa ende nuk ka një bilanc zyrtar të përditësuar për numrin e të shoqëruarve apo të arrestuarve.
