Ashtu si edhe në mandatin e mëparshëm qeverisës, kryeministri Edi Rama në mbledhjen e Asamblesë së Partisë Socialiste prezantoi propozimet për përbërjen e kabinetit qeveritar të mandatit të katërt.
Nga 16 anëtarët e qeverisë të propozuar 6 prej tyre apo rreth 38% do të jenë emra të rinj që do t’i propozohen Kuvendit të Shqipërisë për të qenë pjesë për herë të parë të Këshillit të Ministrave.
Emrat e rinj të propozuar janë, si: Evis Sala në postin e Ministres së Shëndetësisë dhe Mirëqenies Sociale, Andis Salla propozohet në postin e Ministrit të Bujqësisë dhe Zhvillimit Rural, Ervin Demo propozohet në postin Ministër Shteti për Pushtetin Vendor, Besfort Lamallari propozohet në postin e Ministrit të Drejtësisë, Toni Gogu propozohet në postin e Ministrit të Shtetit për Marrëdhëniet me Parlamentin dhe Sofjan Jaupaj propozohet në postin e Ministrit të Mjedisit.
Po ashtu në përbërjen e qeverisë së re janë rikonfirmuar 9 poste ministrash apo 56% e kabinetit, ndërsa 7 anëtarë të qeverisë nuk do të jenë më pjesë e saj.
Kuvendi i Shqipërisë do të mblidhet nesër në seancën e parë të legjislaturës së re, ku pritet të zhvillohet konstituimi i kabinetit të ri qeveritar. Kjo seancë shënon hapin zyrtar drejt nisjes së punës së qeverisë së re, pas propozimit të përbërjes së saj.
Emrat e propozuar të ministrave të qeverisë Rama 4
BELINDA BALLUKU propozohet Zëvendëskryeministre, ministre për Infrastrukturën dhe Energjinë
Ka mbajtur detyrën e Zëvendëskryeministres prej korrikut të vitit 2022 dhe Ministres së Infrastrukturës dhe Energjisë, që prej janarit të vitit 2019.
Më herët, nga shtatori i vitit 2013 e në vazhdim (2019), Znj. Balluku ka shërbyer në pozicionin e Drejtorit të Përgjithshëm në ALBCONTROL, sh.a., Agjencia Kombëtare e Lundrimit Ajror të Republikës së Shqipërisë.
Znj. Balluku është diplomuar në Programin Ekzekutiv “Zhvillim Ekonomik” nga Harvard Kennedy School, si dhe me titull nderi nga IATA (International Air Transport Association) për menaxhimin e shërbimeve të lundrimit ajror (Air Navigation Services Management).
ALBANA KOÇIU propozohet në postin e ministres së Brendshme
Znj.Koçiu është lindur në Tiranë, më 10 Korrik 1977. Prej shtatorit 2023, ka mbajtur postin e Ministres së Shëndetësisë dhe Mbrojtjes Sociale.
Përpara kësaj detyre, Znj. Koçiu ka mbajtur pozicionin e Drejtorit të Departamentit të Administratës Publike që prej vitit 2013. Në kuadër të kësaj detyre, znj. Albana Koçiu u emërua nga qeveria shqiptare si negociatore në procesin screening me Komisionin Evropian, duke kryesuar delegacionet shqiptare në nivel teknik lidhur me procesin e Reformës së Administratës Publike (PAR).
ELISA SPIROPALI propozohet në postin Ministre e Punëve të Jashtme
Nga korriku 2024 znj. Spiropali ka mbajtur postin e Kryetares së Kuvendit të Republikës së Shqipërisë gjatë Legjislaturës X.
Prej janarit 2019 deri në korrik 2024, ka shërbyer si Ministre e Shtetit për Marrëdhëniet me Parlamentin, duke u riemëruar në mandatin e tretë qeverisës të Partisë Socialiste, në shtator 2021.
Para emërimit në detyrë si Ministër Shteti për Marrëdhëniet me Parlamentin, znj. Spiropali ka mbajtur funksionin e nënkryetares së Grupit Parlamentar Socialist dhe të nënkryetares së Komisionit për Punën, Çështjet Sociale dhe Shëndetësinë, prej vitit 2017 deri në vitin 2019.
PETRIT MALAJ propozohet në postin e Ministrit të Financave
Petrit Malaj është lindur në Tiranë më 13 Tetor 1978. Prej muajit korrik 2024, z. Malaj ka mbajtur detyrën e Ministrit të Financave. Përpara kësaj detyre, nga muaji janar 2024, Z. Petrit Malaj shërbeu si Drejtor Ekzekutiv i Agjencisë Kombëtare të Burimeve Natyrore.
Nga viti 2010 z. Malaj mbajti detyrën e Drejtorit Ekzekutiv të BDO Albania, pjesë e BDO Group, Grupi i pestë më i madh në botë në fushën e Konsulencës Financiare, Auditit dhe Taksave. Në vitin 2004 z. Malaj ishte pjesë e Programit të Qeverisë Gjermane, me fokus në tregjet e kapitalit duke u kualifikuar në Bursën e Frankfurtit dhe Bursën Berlin- Bremen.
MIRELA KUMBARO propozohet në postin e Ministres së Arsimit
Mirela Kumbaro Furxhi është lindur në Tiranë, në vitin 1966. Që prej shtatorit 2021 ajo ka shërbyer si Ministre e Turizmit dhe Mjedisit. Në vitin 2013, emërohet Ministre e Kulturës, post që e mbajti për më shumë se 5 vjet, duke u emëruar sërish ministre e Kulturës në vitin 2017 në mandatin e dytë të qeverisë Rama.
Në vitin 2017 është nderuar me Urdhrin “Oficere e Nderit në Art dhe Kulturë” nga Ministria e Kulturës dhe Komunikimit të Francës, me motivacionin për kontribut të lartë në fushën e kulturës dhe të bashkëpunimit shqiptaro-francez.
PIRRO VENGU propozohet në postin e Ministrit të Mbrojtjes
Z.Vengu është lindur më 24 Prill 1986, në Elbasan. Prej korrikut 2024 ai ka mbajtur postin e Ministrit të Mbrojtjes.
Nga viti 2019 e në vijim (2024), z.Vengu ka mbajtur detyrën e Drejtorit të Përgjithshëm Ekzekutiv të Autoritetit Portual Durrës. Në periudhën 2017 deri në 2019, ai ka ushtruar funksionin e Drejtorit të Antikorrupsionit, në Kryeministri.
Ndërsa nga viti 2013 deri në 2017, ka qenë shefi i kabinetit në Ministrinë e Jashtme. Më herët, gjatë viteve 2010 – 2013, z. Vengu ka mbajtur rolin e Koordinatorit të Programeve Kërkimore, European Council on Foreign Relations (Paris, Francë).
EVIS SALA propozohet në postin e Ministres së Shëndetësisë dhe Mirëqenies Sociale
Evis Sala drejton Qendrën për Imazheri Diagnostike dhe Radioterapi Onkologjike në Poliklinikën “Gemelli” dhe është pedagoge në institucionet e arsimit të lartë, ku kontribuon me përvojën e saj akademike dhe kërkimore për formimin e brezit të ri të profesionistëve të shëndetit.
Prof. Sala ka një karrierë të gjatë akademike dhe kërkimore në Mbretërinë e Bashkuar, ku për shumë vite ka qenë pjesë e Universitetit të Kembrixhit dhe ka bashkëdrejtuar Programin e Avancuar të Imazhimit të Kancerit dhe Programin e Integruar të Mjekësisë së Kancerit në Qendrën e Kërkimit të Kancerit në Kembrixh.
BLENDI GONXHJA propozohet në postin e Ministrit Kulturës, Turizmit dhe Sportit
Blendi Gonxhja është lindur në Tiranë, më 15 Qershor 1970. Prej muajit janar 2024, ai ka mbajtur postin e Ministrit të Ekonomisë, Kulturës dhe Inovacionit. Përpara kësaj detyre, nga nëntori 2018, Blendi Gonxhja ka drejtuar Drejtorinë e Përgjithshme të Shërbimeve të Transportit Rrugor.
Nga Tetori 2015, ai drejtoi Agjencinë e Parqeve dhe Rekreacionit të themeluar nga Bashkia Tiranë. Në vitin 2000, Blendi Gonxhja u emërua Nënkryetar i Bashkisë së Tiranës. Ndërsa Pas impenjimit si Këshilltar i Fondacionit “Rothschild” dhe “Packard” në 2003, iu dedikua aktivitetit si një sipërmarrës në fushën e shërbimeve të lidhura me transportin në Greqi dhe Shqipëri.
ADEA PIRDENI propozohet në postin Ministër i Shtetit për Administratën Publike dhe Antikorrupsionin
Znj. Pirdeni është lindur në Tiranë më 1 tetor 1983 dhe prej 16 janarit 2024 mban detyrën e Ministrit të Shtetit për Administratën Publike dhe Antikorrupsionin.
Prej shtatorit 2020, ka shërbyer si Zëvendësministre e Drejtësisë dhe negociatore si pjesë e Grupit Negociator për Aderimin e Republikës së Shqipërisë në BE për Kapitullin 23 “Gjyqësori & të Drejtat Themelore”. Në cilësinë e Zëvendësministres, Znj. Pirdeni ka mbuluar çështje të kuadrit strategjik në fushën e drejtësisë dhe antikorrupsionit.
ANDIS SALLA propozohet në postin e Ministrit të Bujqësisë dhe Zhvillimit Rural
Z.Andis Salla ka mbajtur detyrën e Kryetarit të Bashkisë Cërrik. Ai ka kryer studimet e larta për drejtësi në Fakultetin e Drejtësisë në Universitetin e Tiranës.
Është kualifikuar në vitin 2014 si avokat pranë Dhomës Kombëtare të Avokatisë dhe ka një sërë eksperiencash pune si jurist dhe me vonë si Drejtor i IEVP në Elbasan.
ERVIN DEMO propozohet në postin Ministër Shteti për Pushtetin Vendor
Demo ka lindur në Berat, në vitin 1982. Nga qershori 2019 ai ka mbajtur postin e Kryetarit të Bashkisë Berat.
Në vitin 2017 është emëruar Zëvendësministër i Arsimit Sportit dhe Rinisë, detyrë të cilën e ka mbajtur deri në fund të vitit 2018. Ndërsa gjatë viteve 2012-2016 ka qenë Zv/Rektor i Universitetit të Tiranës.
Ervin Demo ka një karrierë të gjatë në institucionet e arsimit të lartë në vendin tonë. Që nga viti 2004, ka qenë pedagog me kohë të plotë pranë departamentit të Menaxhimit, në Fakultetin e Ekonomisë, Universiteti i Tiranës.
BESFORT LAMALLARI propozohet në postin e Ministrit të Drejtësisë
Besfort Lamallari ka lindur më 18 korrik 1987, në Peshkopi, Dibër. Ai mbajti postin e Zëvendësministrit të Brendshëm që nga 9 Tetori 2017. Z. Lamallari ka përfunduar studimet universitare për Drejtësi në Universitetin e Tiranës, në vitin 2009. Në 2013 është diplomuar në Universitetin e Oksfordit në programin Master shkencor për Kriminologji dhe Drejtësi Penale.
Më herët ka ndjekur studimet pasuniversitare në Itali LL.M “Bashkëpunimi Ndërkombëtar kundër Krimit të Organizuar Transnacional”. Ai është trajnuar nga Këshilli Gjerman për Marrëdhënie me Jashtë (DGAP), si dhe Akademia e Studimeve Politike – Program i Këshillit të Europës. Z. Lamallari vjen nga një eksperiencë intensive kërkimore shkencore, nga e cila spikat roli i tij si hulumtues i pavarur dhe autor i një sërë studimesh në fushën e krimit të organizuar, radikalizmit dhe terrorizmit.
DELINA IBRAHIMAJ propozohet në postin e Ministres së Ekonomisë dhe Inovacionit
Znj.Ibrahimaj është lindur në Tiranë, më 23 dhjetor 1983. Që prej muajit shtator 2023, ajo ka mbajtur postin e Ministres së Shtetit për Sipërmarrjen dhe Klimën e Biznesit.
Përpara kësaj detyre, Znj. Ibrahimaj ka shërbyer si Ministre e Financave dhe Ekonomisë.
Nga viti 2019 e në vijim ka kryer detyrën e Drejtorit të Përgjithshëm të Tatimeve, në 2016-2019 ka ushtruar funksionin e Drejtorit të Përgjithshëm të Institutit të Statistikave dhe në 2015-2016 koordinator për Çështjet Financiare dhe Ekonomike, anëtare e sallës operacionale në Kryeministri.
TONI GOGU propozohet në postin e Ministrit të Shtetit për Marrëdhëniet me Parlamentin
Toni Gogu është jurist dhe më herët ka mbajtur pozicionin si Zëvendësministër i Drejtësisë dhe në legjislaturën e X të Parlamentit të Shqipërisë si deputet i qarkut të Tiranës.
Z.Gogu ka një përvojë të gjatë në administratën publike dhe në hartimin e politikave ligjore që lidhen me transparencën, konfliktin e interesit dhe qeverisjen e mirë. Me formim në drejtësi dhe përvojë të gjatë në çështje ligjore e institucionale, ai ka qenë i angazhuar në disa procese reformuese që synojnë forcimin e integritetit të funksioneve publike.
SOFJAN JAUPAJ propozohet në postin e Ministrit të Mjedisit
Deri më tani Jaupaj mbajti detyrën si Zëvendësministër i Turizmit dhe Mjedisit. Ai u diplomua për Drejtësi në vitin 2013 në Fakultetin e Drejtësisë të Universitetit të Tiranës, ku ka qenë anëtar i rrjetit të studentëve ekselentë të këtij Universiteti dhe ndoqi studimet për të Drejtën e Pronësisë Intelektuale në Itali, Zvicër (përfitues i bursës evropiane të Organizatës Botërore të Pronësisë Intelektuale).
Në 10 vitet e fundit, ai ka mbajtur pozicione të ndryshme në sektorin publik në Shqipëri si Drejtor i Kabinetit të Kryenegociatorit për Integrimin në BE të Shqipërisë, Drejtor i Integrimit dhe Koordinator i Lartë për normat ligjore prioritare të BE-së pranë Kryeministrisë dhe Ministrisë së Kulturës.
MAJLINDA DHUKA propozohet në postin e Ministres së Shtetit dhe Kryenegociatores
Deri më tani Znj. Dhuka ka kryer detyrën e Ministres së Shtetit dhe Kryenegociatores. Më herët, ajo ka ushtruar disa funksione drejtuese si nëpunëse civile në drejtori dhe departamente si të legjislacionit; zhvillimit dhe planifikimit strategjik në Bashkinë e Tiranës, si dhe në bashkëpunimin për zhvillim dhe ndihmën e huaj; programimin e zhvillimit – planifikimin strategjik; mirëqeverisjen dhe politikën publike, në Kryeministri. Gjithashtu, znj. Dhuka ka luajtur rolin e Zëvendëssekretarit të Përgjithshëm të Këshillit të Ministrave.
Znj. Majlinda Dhuka është diplomuar në Fakultetin e Drejtësisë, në Universitetin e Tiranës, si dhe mban diplomën “Master në Studime Evropiane”./Monitor.al
Artikuj te sugjeruar
POLITIKE
11 Shtator14:42
Berisha: Çantat e Ballukut kushtojnë më shumë se aksesorët e qeveritarëve të korruptuar të Nepalit
Kreu i Partisë Demokratike, Sali Berisha, ka mbledhur sot grupin parlamentar të PD-së, ku ka folur për formimin e qeverisë së re d...
POLITIKE
11 Shtator14:25
Berisha emëron kryetarin e Grupit Parlamentar të PD-së/ Detyrat e Këlliçit, Alizotit, Hotit dhe Aliollit
Sali Berisha deklaroi Gazment Bardhi do të vazhdojë të jetë kryetari i Grupit Parlamentar i PD-së, teksa nënkryetarë do t&eum...
POLITIKE
11 Shtator14:22
Berisha: Rama e ka armik veriun, ja se çfarë ka bërë
Sali Berisha deklaroi nga mbledhja e Grupit Parlamentar të PD-së se kryeministri Edi Rama e konsideron si armik veriun e Shqipërisë.
Sipas ...
POLITIKE
11 Shtator14:16
Berisha: Rama bëri Ministër Shëndetësie të deleguarën e Soros-it
Duke folur nga mbledhja e Grupit Parlamentar të PD-së, kryedemokrati Sali Berisha zbuloi se Ministri i Shëndetësisë, Evis Sala ësh...
POLITIKE
11 Shtator14:10
Dikur pjesë e Kembrixh, kush është mjekja radiologe që Rama emëroi si Ministre Shëndetësie
Profesoresha e radiologjisë, Evis Sala, është ministrja e re e cila do të drejtojë Shëndetësinë në vendin ton&eum...
POLITIKE
11 Shtator14:07
Berisha: Kreu i ri i SPAK-ut? Ju tregoj se çfarë po planifikon Rama
Duke folur nga mbledhja e Grupit Parlamentar të PD-së, kryedemokrati Sali Berisha zbuloi se si do të zgjidhet drejtuesi i ri i SPAK-ut.
Berisha ...
POLITIKE
11 Shtator13:58
Berisha: Sot ditë zie për shqiptarët, Rama mashtroi NATO-n dhe SHBA-të
Duke folur nga mbledhja e Grupit Parlamentar të PD-së, kryedemokrati Sali Berisha tha se sot është ditë zie për shqiptarët.
...
POLITIKE
11 Shtator13:49
Berisha: Vendim i vështirë, por Rama do gëzonte nëse ne nuk shkojmë në Parlament
Kreu i Partisë Demokratike, Sali Berisha deklaroi nga mbledhja e Grupit Parlamentar të PD-së se nuk do i bëjë qejfin kryeministrit Edi ...
POLITIKE
11 Shtator13:36
LIVE/ PD mbledh Grupin Parlamentar, Berisha: Kartelet e drogës më të përfaqësuara se kurrë nga Rama
Duke folur nga mbledhja e Grupit Parlamentar të Partisë Demokratike, kryedemokrati Sali Berisha tha se kartelet e drogës më të për...
POLITIKE
11 Shtator13:33
Rama 4 prezanton ministren e parë virtuale: Diella
Në Asamblenë Kombëtare të Partisë Socialiste, kryeministri Edi Rama prezantoi qeverinë e re për mandatin e katërt radh...
