Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
POLITIKE
Protesta e thirrur te Kuvendi/ Berisha: Revoltë për Shqipërinë! Të largojmë qeverinë e narkoshtetit!
b.zPërditësimi i fundit 5 Qershor 2024, 20:51
Sali Berisha
TIRANË - Kreu i PD-së, Sali Berisha u ndal gjatë fjalës së tij në tubimin e përditshëm qytetar te protesta që pritet të zhvillohet ditën e nesërme te Kuvendi, pas investigimit të RAI3 që e cilësonte Shqipërinë si një narko-shtet.
Berisha u shpreh ndër të tjera se kjo protestë sipas tij është një revoltë për Shqipërinë. Berisha shprehet se Eurostat e ka faktuar se në 10 vite Shqipëria ka humbur 1 milion banorë, dhe se për të tretin vit radhazi në Shqipëri ka më shumë vdekje se lindje.
Sipas tij përgjegjës për këtë është kryeministri Rama, ndaj qytetarët duhet ti bashkohen protestës te Parlamenti për të larguar regjimin që sipas tij ka shkatërruar Shqipërinë.
Pjesë nga fjala e Berishës:
Edi Rama nuk do që Sali Berisha të flasë të vërtetat e narkoshtetit të tij. Edi Rama nuk do që Sali Berisha të denoncojë vjedhjet monstruoze. Edi Rama ka tmerr se Sali Berisha lider të opozitës me platformën e tij do të sjellë opozitën në fitore dhe do përmbysë pushtetin e tij. Por sot nuk është më nevoja që Sali Berisha ta thotë të vërtetën. Nuk është më nevoja që Rai 3 apo Bild të thonë të vërtetën.
E vërteta sot është drama më e madhe në historinë e kombit shqiptar. E vërteta është se vendi ynë, në mes të Europës, i bekuar me pasuri nga më të mahnitshmet, klimë dhe begati, po vdes. Shqipëria po vdes të dashur miq. Eurostat e ka faktuar se në 10 vite kemi humbur 1 milion banorë. Po 1 milion banorë janë 35% e popullatës! Rinia shqiptare është në vend të dytë në botë pas Sirisë për largime nga ky dhe i bekur. Për të tretin vit radhazi në Shqipëri ka më shumë vdekje se lindje. Dhe ky trend po thellohet vit pas viti. Sepse një komb nuk jeton dot nëse qeveriset nga narkoshteti.
Një komb është i dënuar me shuarje nëse qeveriset nga narkoshteti. Një qytetar është i destinuar me poshtërim dhe marrje të lirisë nëse qeveriset nga narkoshteti. Për atë nuk ka siguri jete, prone, veprimtarie, lirie, të drejtash. Dhe e vërteta kryesore është se narkoshteti është Edi Rama dhe Edi Rama është narkoshteti. Prandaj nesër, ditën e enjte përpara parlamentit. Ora 10:00. Nuk ka më rëndësi je demokrat, opozitar, socialist, i pa parti, shoqëri civile, i ri apo i vjetër. Nëse je shqiptar. Nëse e do flamurin e kombit. Nëse e do familjen. Nëse e do demokracinë. Nëse e do dinjitetin. Nëse e do kombin.
Të gjithë në këmbë para parlamentit! Kjo nuk është betejë për Sali Berishën. Kjo nuk është për Partinë Demokratike. Kjo nuk është për opozitën. Kjo protestë është protestë revoltë për Shqipërinë. Sepse nëse Shqipëria do të kishte gojë, sot ajo do ulërinte për ndihmë. Nëse Shqipëria, dheu ynë që lëngon, ajo do të ulërinte në kupë të qiellit për ndihmë Nëse Shqipëria do të kishte një thirrje, ajo sot do ishte thirrja ndihmë, ndihmë, më shpëtoni se po më merr shpirtin Edi Rama me narkoshtetin e tij. O sot o kurrë! Para parlamentit. Të gjithë bashkë. Ora 10:00.
