Valëvitja e një flamuri shqiptar me simbole kombëtare në qytetin shqiptar të Gucisë, në Mal të Zi, është sho...
POLITIKE
“Qeveria rikthen fadromat duke shembur pronat e qytetarëve në Vlorë”/ Zhupa: Miratuan ligjin që ndalon punimet gjatë sezonit turistik, por po godasin ekonominë dhe turizmin
PiranjatPërditësimi i fundit 5 Gusht 2026, 11:31
Kryetarja e Komisionit Parlamentar për Turizmin, Kulturën dhe Diasporën, Ina Zhupa, ka akuzuar qeverinë për standarde të dyfishta në zbatimin e ligjit të miratuar së fundmi, që ndalon punimet gjatë sezonit turistik. Zhupa thekson se vetëm dy javë pas miratimit të ligjit, fadromat e shtetit u rikthyen në Vlorë, në kulmin e sezonit, duke krijuar zhurmë, pluhur dhe kaos. Sipas saj, qeveria po shkel ligjin që miratoi vetë, ndërsa aksionet e ndërmarra në zonat turistike dëmtojnë imazhin e vendit, ekonominë lokale, bizneset dhe besimin e turistëve që zgjedhin Shqipërinë si destinacion.
Reagimi i plotë i Ina Zhupës:
Miratuan ligjin që ndalon punimet gjatë sezonit turistik, me argumentin se turistëve duhet t’u garantohet qetësi, pa zhurma, pluhur dhe makineri të rënda në rrugë.
Por në Komisionin për Kulturën dhe Turizmin, kur Taulant Balla e prezantoi këtë nismë, e pyeta: Po Edi Ramën si do ta ndaloni? Sepse vit pas viti, pikërisht në kulmin e sezonit turistik, qeveria nis aksione me fadroma, bllokon rrugë, krijon kaos dhe dëmton imazhin e vendit. Madje, shpesh këto ndërhyrje janë shumë më të rënda se çdo punim privat.
Nuk kaluan as dy javë nga miratimi i ligjit dhe propaganda e qeverisë u rrëzua nga vetë qeveria. Edi Ramën se ndaluan dot nga prishja e imazhit të vendit. Dje, në Vlorën turistike, në mes të sezonit, fadromat u rikthyen duke shembur prona të qytetarëve. Zhurmë, pluhur, makineri të rënda dhe një imazh që nuk i shërben aspak turizmit.
Atëherë, çfarë vlere ka ky ligj, kur qeveria e konsideron veten mbi ligjin? Si ka mundësi që makineritë e privatit prishin sezonin, ndërsa ato të qeverisë jo? Si ndryshon zhurma, pluhuri dhe kaosi vetëm sepse fadroma është shtetërore?
Kjo mani për të ndërmarrë aksione në kulmin e sezonit turistik nuk dëmton vetëm qytetarët, por godet edhe ekonominë lokale, bizneset, punën e mijëra familjeve dhe besimin e turistëve që zgjedhin Shqipërinë si destinacion.
