Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
POLITIKE
Rama: Burimin e Tragjasit do e marrin “strategjikët”, uji nuk është i atyre që e kanë afër
PiranjatPërditësimi i fundit 3 Shtator 2025, 13:54
Kryeministri Edi Rama është detyruar sërish t’u kthehet polemikave për projektin e ujësjellësit të Tragjasit, që synon të furnizojë me ujë zonat elitare turistike të Dhërmiut dhe Palasës. Në një dalje publike për prezantimin e Operatorit Kombëtar të Prodhimit të Ujit, Rama mohoi kategorikisht se burimet ujore po i merren komuniteteve vendase për t'iu dhënë oligarkëve.
Por ndonëse i mohon si "konspiracione", zërat kritikë janë të shumtë. Banorët kanë ngritur shqetësimin se projektet e fundit rrezikojnë të lënë fshatra të tëra pa furnizim të qëndrueshëm, për të përmbushur kërkesat e komplekseve luksoze turistike.
“Sot po ndërtohet ujësjellësi i Tragjasit. Nuk kishte ujë e bërtisnin për burimin a thua se vajti një kuçedër që tu thante burimin ku e pinin uji nga burimi”, theksoi ai.
Rama shtoi se uji është i Shqipërisë dhe jo i atyre që e kanë më afër, duke shtuar se ai nuk ka qëllime të errëta. Po ashtu, ai shtoi edhe se në Shqipëri, sipas tij, nuk ka oligarkë.
“Të gjithë do ta kuptojnë që burimet ujore të Republikës së Shqipërisë, nuk janë burimet e atij që i ka më afër, janë burimet ujore të Republikës së Shqipërisë. Në Republikën e Shqipërisë nuk ka njerëz me fat që e kanë ujin afër dhe njerëz pafat që kanë burimin larg. Siç ua kam shpjeguar shumë banorëve të Tragjasit, as nuk diskutohet që nuk ekziston në asnjë botë tjetër, veçse në botën e konspiracioneve dhe fantazive politike, mediatike, apo rreth tryezës duke pirë raki, që qeveria e Shqipërisë, ministria, t’i marrin ujin disave për t’ia dhënë disave.
Ata që çohen dhe flasin, janë dhe ca që falsin anglisht për Vjosën, dhe se si ne po thajmë një burim të Shushicës për të shuar etjen e popullit tonë dhe se si ne po thajmë një degë të lumit për të furnizuar me ujë të pijshëm banorët e Himarës. Ata s’kanë për ta kuptuar, se marrin fonde për këtë punë, por duhet ta dinë që prioriteti është furnizimi me ujë i popullsisë. Në ekuilibrin më të mirë të mundshëm me natyrën, as në rastin e Shushicës, as Tragjasit nuk bëhet fjalë për investime të papërgjegjshme për të tharë. Duke respektuar njerëzit atje, 9 muaj, ditë për ditë, kemi bërë të gjithë raportin e monitorimit të burimit, shifrat janë kaq kokëforta dhe kuptim plota, sa s’kanë diskutim që projekti ishte i drejtë, jo se ishte projekt që financohej nga qeveria, por i bërë mbi monitorimin e burimit. Nuk ka qeveria qëllime të errëta, nuk ua heqim uji njerëz të për t’ua dhënë oligarkëve. Oligarkë në Shqipëri nuk ka, nuk bën vaki kjo”, tha Rama./Piranjat.al
