"Shlyemë detyrimet e mbartura në 3 nga ndërmarrjet ushtarake!" Komisioni i Sigurisë/ Vengu: Buxheti me rritje, kap 2% e vendosur nga NATO

TIRANA- Komisioni për Sigurinë Kombëtare zhvillon sot mbledhjen e radhës ku po shqyrtohet në parim i projektligjit “Për buxhetin e vitit 2025” të Ministrisë së Mbrojtjes. Ministri i Mbrojtjes Pirro Vengu tha në mbledhje se buxheti parashikon kapjen e standardit financiar të NATO-s për kuotën 2% të GDP-së. Gjithashtu Vengu njoftoi se ka edhe rritje të buxhetit për ushtrinë në krahasim me vitin e kaluar.

Ai bëri me dije edhe për shlyerjen e detyrimeve të prapambetura në uzinat ushtarake të armëve Poliçan, Mjekës dhe Gramsh, nëpërmjet buxhetimit, si për personelin dhe ish-punonjësit, ashtu edhe detyrimeve të tjera. Ministri dha detaje edhe për industrinë ushtarake si projekt në prodhimin e armatimeve, ku theksoi ngritjen e kompanisë shtetërore për këtë qëllim, por edhe industria tjetër, në çështjet e licencimit dhe prodhimit.

"Është parashikuar fond për Kampusin Modern për forcat e armatosura, për kushte të nevojshme, që të mos zgjasi tranzicioni i Akademisë në kampusin e ri, ndaj kemi dedikuar 242 mln lekë për kampusin e ri të fortave të armatosura. Mbi 2% të GDP-së për shpenzimet e mbrojtjes, një ndër vendet e pakëta të aleancës që e realizon sipas rregullave të NATO-s. Buxheti më i lartë nga viti i kaluar, mbi 2%. Shlyemë detyrimet e mbartura prej një dekade në tre nga ndërmarrjet e industrisë ushtarake Mjekës, Gramsh Poliçan. Rrogat e prapambetura, vendimet gjyqësore dhe detyrimeve të tjera. Poliçani është totalisht i buxhetuar”, tha Vengu.

pirro vengu