Kryetari i Partisë Demokratike, Sali Berisha, ka folur për mediat para Kuvendit, ku ka kundërshtuar mënyrën se si, sipas tij, po proc...
POLITIKE
Snajper në tarracë dhe forca të shumta policie, çfarë po ndodh te Kryeministria?
PiranjatPërditësimi i fundit 17 Prill 2026, 19:13
Pak minuta para nisjes së protestës së thirrur nga opozita, situata para Kryeministrisë paraqitet jo problematike, ndërkohë janë ndërmarrë masa të forta sigurie nga Policia e Shtetit. Dhjetëra mbështetës të Partisë Demokratike janë grumbulluar në selinë blu, ndërkohë që forcat policore kanë nisur pozicionimin në zonën qendrore të Tiranës.
Sipas burimeve zyrtare, rreth 15o0 efektivë policie janë angazhuar për mbarëvajtjen e protestës, me fokus të veçantë sigurinë e godinës së qeverisë, e cila është blinduar.
Policia ka marrë masa shtesë për skenarë të mundshëm dhune, përfshirë hedhjen e mjeteve piroteknike, ndërsa në tarracën e Kryeministrisë raportohet se janë vendosur snajperë.
Mbi 1500 forca të policisë, duke nisur nga ato të rendit, FNSH, Shqiponjat do të jenë të angazhuar për mbarëvajtjen e protestës. Në gatishmëri do të jenë edhe forcat RENEA në rast nevoje.
Gjithashtu edhe Garda e Republikës do të jetë e gjitha në gatishmëri për të kryer detyrën në ruajtjen e institucioneve. Ndërkohë në protestë të gjithë efektivët do të jenë të pajisur me maska kundragaz.
Do të ketë edhe autobotë me ujë që do të qëndrojnë pas Kryeministrisë nëse do të ketë nevojë në raste incidentesh, ndërsa godina e Kryeministrisë është ‘veshur’ me gardh metalik.
Ashtu si në çdo protestë është krijohet kordoni me efektivë policie para kryeministrisë dhe perimetrit rreth saj. Në terren do të përfshihen edhe agjentët civilë.
Policia ka instaluar përgjatë gjithë bulevardit ‘Dëshmorët e Kombit’ kamera me rezolucion të lartë.
Nga ana tjetër, opozita ka vijuar përgatitjet për tubimin, duke vendosur podiumin nga ku pritet të mbahen fjalimet kryesore.
Protesta e sotme konsiderohet nga organizatorët si nisja e një serie aksionesh opozitare, me synimin për të ushtruar presion politik ndaj qeverisë dhe për të kërkuar largimin e kryeministrit Edi Rama nga pushteti.
