Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
POLITIKE
Tabaku nga Berlini: Integrimi nuk është propagandë, por ligj, institucione dhe luftë kundër korrupsionit
PiranjatPërditësimi i fundit 20 Maj 2026, 17:53
Deputetja e Partisë Demokratike dhe njëkohësisht një nga zërat më aktivë për integrimin europian, Jorida Tabaku, ka përmbyllur një vizitë tre ditore në Gjermani me ftesë të qeverisë gjermane, ku zhvilloi takime në Ministrinë e Jashtme gjermane, në Bundestag, në Kancelari si dhe me përfaqësues të biznesit dhe politikës gjermane.
Në videon e publikuar në rrjetet sociale, Tabaku theksoi se gjatë diskutimeve fokusi kryesor ka qenë procesi i integrimit europian, sfidat që hasin qytetarët shqiptarë dhe pengesat me të cilat përballen bizneset në Shqipëri.
Sipas saj, problematika kryesore mbetet mungesa e sigurisë ligjore, zbatimi i dobët i ligjit dhe korrupsioni, çështje që ndikojnë drejtpërdrejt si tek investimet e huaja ashtu edhe tek cilësia e jetës së qytetarëve shqiptarë.
“Problemet kryesore që hasin shqiptarët dhe bizneset lidhen me ligjin, me zbatimin e ligjit dhe me luftën kundër korrupsionit”, u shpreh Tabaku.
Deputetja demokrate vlerësoi gjithashtu rolin e Gjermanisë në procesin e integrimit europian të Shqipërisë dhe Ballkanit Perëndimor, duke e cilësuar Berlinin si mbështetësen kryesore të këtij procesi dhe motorin e Procesit të Berlinit.
“Gjermania ka qenë mbrojtësja kryesore e këtij procesi dhe shtytësja kryesore e Procesit të Berlinit, duke e bërë këtë për Shqipërinë dhe për shqiptarët”, deklaroi ajo.
Tabaku nënvizoi se integrimi europian nuk është thjesht një debat politik, por një proces që prek drejtpërdrejt jetën e qytetarëve dhe të ardhmen ekonomike të vendit.
“Procesi i integrimit është i vetmi proces që do ta ndryshojë Shqipërinë”, tha Tabaku.
Gjatë vizitës në Gjermani, ajo zhvilloi takime edhe me Komisionin për Politikën e Jashtme dhe Çështjet Europiane në Bundestag, shoqata biznesi dhe përfaqësues të rëndësishëm gjermanë, ku u diskutua mbi potencialin ekonomik dhe gjeostrategjik të Shqipërisë në një Europë që po ndryshon shpejt.
Sipas Tabakut, Shqipëria mund të shndërrohet në një partner serioz për investimet dhe industrinë europiane, por kjo kërkon reforma reale, ekonomi tregu funksionale, konkurrencë të ndershme dhe institucione që funksionojnë për qytetarët dhe sipërmarrjen.
Teksti:
Në përfundim të një vizite tre ditore në Gjermani, në Ministrinë e Jashtme ku diskutuam për procesin e integrimit, problemet kryesore që hasin shqiptarët, që hasin bizneset, lidhen sigurisht me ligjin, lidhen me zbatimin e ligjit, luftën kundër korrupsionit.
Por më e rëndësishmja është qëndrimi i qeverisë Gjermane. Gjermania ka qenë mbrojtësja kryesore e këtij procesi, shtytësja kryesore e Procesit të Berlinit dhe e bën këtë për Shqipërinë dhe për shqiptarët, duke pasur parasysh që integrimi është projekti më i rëndësishëm.
Këto tema sigurisht janë tema të politikës, por janë tema edhe të jetës së qytetarëve shqiptarë, sepse procesi i integrimit është i vetmi proces që do e ndryshojë Shqipërinë.
