Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
POLITIKE
Takimi me shqiptarët në Romë, Berisha: Italia i ka dhënë Shqipërisë një ndihmë të jashtëzakonshme, projektet e ardhshme mes nesh do të jenë edhe më të mëdha
r.llPërditësimi i fundit 9 Shkurt 2025, 14:42
sali berisha
ITALI- Kryetari i Partisë Demokratike, Sali Berisha po zhvillon sot një takim me shqiptarët e Italisë në Romë. Berisha falenderoi të pranishmit për mikpritjen shqiptarët e Italisë, ndërsa vlerësoi punët e tyre në këtë shtet.
Ai u shpreh se në 34 vitet e fundit, Italia e ka ndihmuar shumë Shqipërinë, ndihmë që ai tha se shkon në miliarda euro. Gjatë fjalës së tij, kryedemokrati ka kujtuar edhe takimet me ish-kryeministrin Silvio Berlusconi, i cili tha se në çdo takim mes tyre shprehej pozitivisht për shqiptarët.
Lideri i opozitës tha se me qeverinë italiane janë firmosur qindra marrëveshje bashkëpunimi në të gjitha fushat, dhe janë ndërmarrë sipërmarrje me rëndësi strategjike për Europën siç është gazsjellësi TAP. Më tej paralajmëroi se projektet e ardhshme mes dy vendeve do jenë edhe më të mëdha.
PJESË NGA FJALA E BERISHËS:
Së pari përshëndetjet më të përzemërta për ju emigrantë shqiptarë të pranishëm në këtë sallë. Për shqiptarët dhe miqtë e tyre italianë kudo që ndodhen sot në tërë Italinë. Për prindërit dhe familjet tuaja në Shqipëri. Mirënjohje të pakufishme për praninë tuaj. Një falënderim dhe mirënjohje të përzemërt miqve tanë italianë, deputetes së Forza Italia, zonjës Erika Maseti. Mikut tim, deputetit Aleksandro Batilokio.
Ish-senatorit dhe gazetarit të shquar italian Antonio Razi. Mikut tim Pepe Leone. Një falënderim shumë të madh për pritjen vëllazërore, nderimet e mia më të pakufishme, më të përzemërta, më të flakta. Të dashur miq, lidhje të hershme tradicionale trashëgojnë dy popujt dhe dy vendet tona mike. Arbëreshët në pesë shekuj ekzistencë, falë dashurisë së tyre për dheun mëmë dhe dashamirësisë së vendasve arritën të ruajnë gjuhën, identitetin dhe kulturën e tyre kombëtare. Por jo vetëm kaq, ata i dhanë këtij kombi personalitete të shquara, kryetarë qeverie, guvernatorë, ministra, ambasadorë, poetë, shkrimtarë, artistë, këngëtarë.
Kjo diasporë në Itali do të ishte dhe djepi i rilindjes tonë kombëtare. Pas rënies së Perdes së Hekurt, si ajo pas vdekjes së prijësit tonë të përjetshëm, Skënderbeut, një valë më e madhe emigracioni do të mërgonte në Itali. Një gazetar italian në atë kohë foli për njerëz që vijnë nga një popull fantazëm. Nuk do motivet për të cilat ai e tha atë, por di që ai pothuajse nuk ekzagjeroi asgjë. Sepse ne në atë kohë ishim njerëzit më të rraskapitur të planetit nga diktatura staliniste e kasaphanës së luftës së klasave, nga tirania e hiperkolektivizimit dhe mjerimit, nga diktatura e izolimit dhe indoktrinimit. Por miqtë e mi, ata shqiptarë fantazmë të asaj kohe dhe të tjerë që mbërritën më vonë, me sakrifica, punë, ndershmëri, mençuri, devocion, u dëshmuan në këtë vend punëtorë të aftë, sipërmarrës të suksesshëm, partnerë luajalë, studentë të shkëlqyer, artistë, shkencëtarë, këngëtarë të mëdhenj që me suksesin e tyre, në dheun e tyre krenohet kombi italian, krenohet kombi shqiptar.
Zoti i bekoftë Italinë, këtë komb të madh. Në 34 vitet e fundit, Italia i ka dhënë Shqipërisë një ndihmë të jashtëzakonshme që shkon në miliarda euro. Italia është vendi ku shqiptarët mësuan se kudo tjetër. Shqiptarët sollën në vendin e tyre me mijëra të reja me të cilën transformuan Shqipërinë. Ndaj dhe unë dua të përulem me mirënjohjen më të madhe para këtij kombi mik, para të gjithë italianëve që pritën, punësuan dhe punojnë me shqiptarët. Një mirënjohje të veçantë kam unë për autoritetet shtetërore të këtij vendi, nga Andreoti tek i pavdekshmi Silvio Berluskoni. Nga Tatarela tek Fini, Butilione e presidenti Tajani e miqtë e mi në Forza Italia. Nuk harroj kurrë takimet e mia me Silvio Berluskonin. Në çdo takim do më thoshte, Sali, me shqiptarët nuk kemi asnjë problem, janë të shkëlqyer. Me qeverinë italiane kemi firmosur qindra marrëveshje bashkëpunimi në të gjitha fushat, por kemi ndërmarrë edhe sipërmarrje me rëndësi strategjike për Europën siç është gazsjellësi TAP. Projektet e ardhshme do jenë edhe më të mëdha.
