Personi në foto, efektivi i ‘Shqiponjave’ Edison Adri, i cili mbeti i plagosur gjatë operacionit policor të zhvilluar në zon&e...
POLITIKE
VOA zbardh detajet nga kontrolli i hyrje-daljeve të muxhahedinëve nga kampi Ashraf 3
PiranjatPërditësimi i fundit 29 Qershor 2023, 19:42
Në Shqipëri, policia po kontrollon hyrje-daljet nga kampi Ashraf 3, në Manzë, ku strehohen afro 2500 anëtarë të organizatës MEK, muxhahedinët e popullit Iranian. Masat e policisë pasojnë përplasjet e forta që ndodhën pasi policia ndërhyrjen javën e shkuar në brendësi të kampit, për kontrollin e mjediseve, në zbatim të një vendimi të Gjykatës së Posaçme kundër Krimit të organizuar dhe Korrupsionit. Prokuroria e posaçme ka dyshime se MEK, ka organizuar sulme kibernetike ndaj Iranit. Punonjës të policisë, përfshirë ata të njësisë antiterror, po qëndrojnë në hyrje të kampit Ashraf 3, duke mbajtur nën mbikqyrje çdo lëvizje. Banorët që dalin rregjistrohen me emër, pasi kanë dhënë dhe arsyet e lëvizjes, e po ashtu dhe automjetet i nënshtrohen kontrolleve.
Pas shumë vitesh qëndrimi në Shqipëri, ku anëtarët e organizatës MEK, u pritën për arsye humanitare, dhe angazhimit të autoriteteve për mbrojtjen e tyre, situata ka ndryshuar ndjeshëm, pasi javën e shkuar, Gjykata miratoi urdhërin e Prokurorisë së Posaçme për të ndërhyrë dhe ushtruar kontroll në mjediset e shumta të kampit. Rezistenca e banorëve, sidomos kur forcat e shumta të policisë ju afruan sallave të serverave, çoi deri në përplasje mes palëve.
Muxhahedinët folën për ushtrim dhune nga policia, duke akuzuar atë madje si përgjegjëse për humbjen e jetës së njërit prej banorëve. Por autoritetet shqiptare mohuan kategorikisht të kenë përdorur forcën, duke deklarauar se askush nuk mund të pengojë zbatimin e vendimit të Gykatës. Sipas policisë, nga brenda kampit kishte patur përpjekje për të fshehur materiale të ndryshme, duke shpërndarë për këtë dhe pamje filmike, përfshirë rezistencën ndaj policisë. Dhjetra kompjuterë e laptop si dhe material të shumta shkresore u sekuestruan.
Drejtuesit e MEK-ut reaguan me një gjuhë të ashpër duke e cilësuar ndërhyrjen e policisë si “sjellje kriminale e barbare”, që madje sipas tyre ishte nxitur nga Irani, shtet me të cilin Shqipëria ndërpreu verën e kaluar, marrëdhëniet diplomatike, pasi deklaroi se ishte organizatori i sulmit masiv kibernetik mbi infrastrukturën digjitale të vendit.
MEK-u po ashtu kërkoi nga Shtetet e Bashkuara dhe OKB-ja që të dënonin ngjarjen. Por në fakt Uashingtoni I doli në krah autoriteteve shqiptare. Ambasadorja amerikane në Tiranë, Yuri Kim deklaroi se “mbështesim të drejtën e Shqipërisë, për të zbatuar ligjet e saj në vendin e saj. Ka gjithashtu terma të caktuar që zbatohen për çdo lloj mysafiri, dhe këta mysafirë duhet t’i respektojnë ato”.
Ndërhryja në Kampin Ashraf 3 u urdhërua pasi hetimet e Prokurorisë së Posaçme, dhe të dhënat e grumbulluara nga policia, çuan në dyshime të forta se anëtarët e MEK-ut kanë përdorur territorin shqiptar për të kryer sulme kibernetike ndaj Republikës Islamike të Iranit, në disa periudha të ndryshme kohore, si dhe drejt disa institucioneve në shtetin Iranian, dhe madje, “se pjestarë të organizatës, janë të përfshirë në aktvitet kriminal të terrorizmit dhe të financimit të terrorizmit”/VOA
