Senatorja amerikane Elissa Slotkin (Demokrate nga Miçigani) ka reaguar në rrjetin social X lidhur me dhunën policore në protestën stu...
SHOWBIZ
Jennifer Aniston: Është tronditëse çfarë po ndodh me inteligjencën artificiale
PiranjatPërditësimi i fundit 13 Tetor 2025, 10:17
Aktorja e njohur Jennifer Aniston ka shprehur shqetësimin e saj për mënyrën se si inteligjenca artificiale (AI) dhe teknologjia ‘deepfake’ po përdoren për të keqpërdorur imazhin e saj në reklama mashtruese.
Në një intervistë për Harper’s Bazaar UK, Aniston tregoi se shpesh merr njoftime nga miqtë për video apo reklama të rreme ku shfaqet fytyra e saj, pa dijeninë e saj.
“Është shumë shqetësuese ajo që po ndodh me AI-në. Ndonjëherë ia dërgoj avokatëve që të ndërhyjnë,” tha ajo, duke e përshkruar situatën si “një tren që ka dalë nga kontrolli”.
Aktorja theksoi se ka parë versione të manipuluara të vetes që promovojnë produkte për humbje peshe apo suplementë kolagjeni, duke i quajtur ato “të frikshme” për nga realizmi.
Por Aniston nuk është e vetmja viktimë e këtij fenomeni. Një britanik 43-vjeçar, Paul Davis, u mashtrua duke besuar se po komunikonte me aktoren dhe humbi 266 dollarë në kartela dhuratë Apple. Mashtruesi madje kishte përdorur një patentë shoferi false me emrin dhe fotografinë e Jennifer-it.
Edhe Brad Pitt, ish-bashkëshorti i saj, është përballur me raste të ngjashme. Një grua franceze humbi mbi 900,000 dollarë, pasi u mashtrua duke besuar se kishte një lidhje me aktorin.
Agjenti i Pitt i quajti këto mashtrime “të tmerrshme”, ndërsa u bëri thirrje fansave të jenë të kujdesshëm ndaj llogarive të rreme dhe mesazheve të pa kërkuara.
Në fund, Jennifer Aniston bëri apel për vendosjen e kufijve ligjorë dhe etikë në përdorimin e inteligjencës artificiale, duke theksuar se:
“AI u krijua për të ndihmuar njerëzimin, por tani po dëmton një pjesë të madhe të tij.”
