Në fjalën e saj në Kuvend Ina Zhupa ka mbajtur një qëndrim të ashpër ndaj qeverisë Rama.
Zhupa theksoi se ësht&e...
SOCIALE
Bankat morën pothuajse 76 mijë aplikime për kredi në 6-mujorin e kaluar, refuzuan 27% të tyre
M.B.Përditësimi i fundit 28 Prill 2025, 11:34
TIRANA- Kërkesa për kredi në sektorin bankar u rrit me ritme dyshifrore në gjysmën e dytë të vitit të kaluar. Sipas informacionit të Bankës së Shqipërisë, bankat raportojnë se kanë marrë në shqyrtim gjithsej 75 530 aplikime për kredi gjatë kësaj periudhe.
Numri total i aplikimeve për kredi të shqyrtuara nga bankat, ka shënuar rritje me 4.3% krahasuar me gjashtëmujorin e kaluar dhe me 12.1% krahasuar me një vit më parë. Në terma vjetorë, numri i aplikimeve të shqyrtuara ka qenë në rritje për të tre segmentet e klientelës, por më e theksuar në rastin e individëve (“ndërmarrjet e vogla dhe të mesme” me 22.1%, ndërmarrjet e tjera me 8.2% dhe “individët” me 15.9%).
Sipas segmentit të klientëve, rreth 9% e aplikimeve i përkisnin bizneseve (5.1% ose 3 871 aplikime nga “ndërmarrjet e vogla dhe të mesme” dhe 3.7% ose 2 778 aplikime nga “ndërmarrje të mëdha”) dhe 91% (ose 68 881 aplikime) i përkisnin “sektorit të individëve”.
Krahasuar me periudhën e kaluar, kjo shpërndarje ka shënuar një zhvendosje të lehtë në favor të sektorit të individëve. Në terma gjashtëmujorë, rritja ka ardhur vetëm nga grupi i “ndërmarrjeve të tjera”, ku përgjithësisht përfshihen ndërmarrjet e mëdha (rritje me 7%), ndërkohë që numri i aplikimeve të shqyrtuara në segmentet e “ndërmarrjeve të vogla dhe të mesme” dhe “individëve” ka rezultuar në rënie (respektivisht me 6.1% dhe 1.1%).
Në totalin e aplikimeve të marra në shqyrtim gjatë periudhës, rezulton se rreth 27% e tyre janë refuzuar nga bankat dhe kjo normë mbetet më e lartë dhe në rritje në rastin e individëve . Norma e refuzimit është rritur me 2.3 pikë përqindje krahasuar me gjashtë muaj më parë dhe me 6.7 pikë përqindje ndaj një viti më parë; në të dy periudhat krahasuese, rritja ka qenë më e theksuar në individëve.
Norma totale e refuzimit ka rezultuar në rritje për bankat me kapital vendas dhe për ato me kapital të huaj. Vihet re se gjatë periudhës, dy grupet bankare kanë shfaqur qëndrime të ngjashme ndaj kërkesave për kredi të “individëve”, duke shfaqur prirje shtrënguese krahasuar me periudhën paraardhëse dhe krahasuar me një vit më parë.
Ky qëndrim është ndjeshëm më i dukshëm tek bankat e huaja, të cilat kanë refuzuar rreth 37% të kërkesave të individëve, krahasuar me bankat vendase, ku kjo normë ka rezultuar 9%. Në të njëjtën kohë, të dy grupet e bankave mbeten më pranuese ndaj segmentit të ndërmarrjeve, por prirjet kanë qenë të ndryshme gjatë periudhës.
Kështu, bankat vendase kanë pasur qëndrim më shtrëngues si ndaj “ndërmarrjeve te vogla dhe të mesme” dhe ndaj atyre “të mëdha”, duke rritur normën e refuzimit respektivisht në 6% dhe 4% të kërkesave, ndërsa bankat e huaja duket se vijojnë të fokusohen te kreditimi i ndërmarrjeve të mëdha (kategoria “ndërmarrje të tjera”), duke refuzuar vetëm 2% të kërkesave të tyre për kredi./ Monitor
