Senatorja amerikane Elissa Slotkin (Demokrate nga Miçigani) ka reaguar në rrjetin social X lidhur me dhunën policore në protestën stu...
SOCIALE
Braktiset Ngraçani i Mallakastrës, vetëm 7 nxënës në shkollë!
PiranjatPërditësimi i fundit 5 Shtator 2025, 23:14
Viti i ri shkollor 2025-2026 ka nisur me një realitet të trishtë për shkollën 9-vjeçare “Rexhep Ahmet Haxhiaj” në Ngraçan të Mallakastrës, e cila sot numëron vetëm 7 nxënës në total. Dikur kjo shkollë kishte mbi 270 fëmijë, por sot është thuajse bosh.
Sipas banorëve të zonës, kjo rënie drastike është pasojë e braktisjes masive të fshatit, për shkak të mungesës së investimeve. Rruga kryesore prej afro 2 kilometrash është e pakalueshme, ndërsa mungesat e shpeshta të energjisë elektrike e kanë bërë jetesën thuajse të pamundur. Të gjitha këto kushte të vështira kanë detyruar shumë familje të largohen drejt qyteteve apo jashtë vendit.
“Energjia elektrike, një erë të fryjë, ne rrimë pa drita.
Kanë ikur të tërë. Edhe këta që janë, i çojnë në Ballsh.
Nxënësit shkojnë në Ballsh, me furgon”, shprehen banorët.
Nga 300 familje që numëroheshin deri ne vitet ’90, sot kanë mbetur vetëm 63 familje. Veçanërisht të moshuarit kujtojnë me nostalgji kohën kur Ngraçani gumëzhinte nga zërat e fëmijëve, ndërsa shprehin keqardhje se shkolla ka mbetur vetëm me 7 nxënës.
“E kemi të vështirë për të ta përballuar. 2 familje që janë ku t’i çosh”, shprehen banorët.
Ngraçani, është një zonë arsimdashëse. Sipas kryeplakut, Sabri Saliaj shkollë është ndërtuar në kohën e Zogut dhe ka nxjerrë emra të shquar, mes të cilëve regjisorin e njohur Mevlan Shanaj.
“Shkolla është hapur në vitin 1938. Vite më parë numëronte 270 nxënës. Njerëzit po katandisen, po ikin, po bëjnë rrugë të gjatë në Ballsh. Kemi vajtur tek kryetari i bashkisë disa herë dhe ai tha, jo në shtator, dhe kjo po zvarritet. Njerëzit do ikin”, shprehet ai.
Këtë vit shkollor, për shkak të numrit të ulët të nxënësve mësimi do të zhvillohet në një klasë kolektive.
Banorët apelojnë për të gjitha institucionet përgjegjëse që të marrin masat e duhura që kjo shkollë me traditë, e ndërtuar që në kohën e Ahmet Zogut dhe që ka nxjerrë emra të njohur intelektualësh, të mos braktiset e të mos mbyllet.
