Në prag të miqësores Shqipëri – Izrael, e cila do të mbahet sonte në stadiumin “Air Albania” të Tiran&...
SOCIALE
Frika e prindërve, bie numri i vaksinimit të fëmijëve 1 vjeç
PiranjatPërditësimi i fundit 28 Prill 2026, 18:56
Prindërit vazhdojnë të jenë skeptikë dhe hezitojnë të vaksinojnë fëmijët që kanë mbushur 1 vjeç kundër fruth-rubeolës, me frikën se vaksina shkakton autizëm. Në javën Europiane të Imunizimit, specialistja e ISHP-së Rovena Daja tha se kjo vaksinë ka mbulueshmërinë më të ulët në vend, në raport me vaksinat e tjera, si pjesë e kalendarit të vaksinave të fëmijëve.
“Prindërit nuk marrin informacion në burime të sigurta dhe te personeli shëndetësor dhe e lidhin me autizmin. Mbulesa vaksinale me dozë të parë vazhdon të jetë akoma në nivelet 81-82%, por prindërit harrojnë se fëmija që ka bërë 1 vjeç nuk ka më asnjë trup nga nëna dhe mund të infektohen nga fruthi dhe mund të përfundojë në spital dhe deri në vdekje. Vaksinën e shtyjnë deri në 15 apo 18 muaj, por jo më shumë, pasi nuk ëshë më efektive,” nënvizoi Daja.
Një nga arsyet kryesore të hezitimit mbetet miti i lidhjes mes vaksinës dhe autizmit, një pretendim i rrëzuar nga komuniteti shkencor ndërkombëtar. Organizata Botërore e Shëndetësisë dhe Qendrat për Kontrollin dhe Parandalimin e Sëmundjeve kanë konfirmuar se vaksinat janë të sigurta dhe efektive.
Sipas OBSH, vaksinat janë testuar dhe është provuar se parandalojnë sëmundje të rënda, duke shpëtuar miliona jetë fëmijësh çdo vit.
Mjekët pediatër theksojnë rëndësinë e vaksinimit të rregullt, si një proces jetik për mbrojtjen e shëndetit të fëmijëve kundër sëmundjeve të parandalueshme. Sipas mjekes pediatre Loreta Gjoni nuk ekziston asnjë provë shkencore që lidh vaksinat me shfaqjen e autizmit:
“Vaksinimi është një proces për forcimin e sistemit imunitar të fëmijës dhe për mbrojtjen nga infeksione të shumta. Vaksinat duhet të respektohen në mënyrë të rregullt sipas grup-moshës. Nuk mund ta privojmë fëmijën nga një e drejtë për të qenë i shëndetshëm. Vaksinat nuk janë shpikur kot, por janë të bazuara shkencërisht dhe mbrojnë fëmijët,” tha Gjoni.
Informacioni i pasaktë dhe ndikimi i rrjeteve sociale po sfidojnë autoritetin e mjekëve, ndërsa institucionet shëndetësore po përpiqen të rrisin ndërgjegjësimin përmes fushatave publike. Instituti i Shëndetit Publik u ka bërë thirrje prindërve të mos hezitojnë për të vaksinuar fëmijët kundër fruthit dhe rubeolës.
Nga ana tjetër, Instituti i Shëndetit Publik raporton një mbulesë vaksinale të lartë mbi 98% ndaj Hepatitit B. Ndërkohë, vihet re një rritje e interesit për vaksinën kundër Virusit të Papilomës Humane HPV edhe nga djemtë.
“Janë mbi 50 mijë djem dhe vajza që kanë aplikuar vaksinën e HPV-së. Menduam se djemtë mund të ishin pak hezitues, por rezulton se ata po shkojnë dhe po vaksinohen,” u shpreh Rovena Daja.
Ndërsa shkenca është e qartë mbi sigurinë e vaksinave, sfida mbetet lufta kundër dezinformimit dhe rikthimi i besimit tek prindërit. Vaksinimi nuk është një zgjedhje individuale, por një përgjegjësi për të mbrojtur shëndetin e të vegjëlve./ acqj.al
