Gjykata Themelore në Prishtinë e ka dënuar me 12 vjet burgim Ekrem Bajroviqin, i akuzuar për krime lufte kundër popullatës civil...
SPORT
12 deri në 15 milionë euro, Interi nxjerr në shitje Kristjan Asllanin
PiranjatPërditësimi i fundit 3 Korrik 2026, 17:32
E ardhmja e Kristjan Asllanit te Interi duket gjithnjë e më larg. Sipas mediave italiane, mesfushori i Kombëtares shqiptare është një nga futbollistët që pritet të largohet gjatë merkatos së verës, pasi klubi zikaltër synon të krijojë hapësira në organikë dhe të sigurojë të ardhura nga shitja e lojtarëve që nuk bëjnë më pjesë në projektin teknik.
Në listën e largimeve figuron edhe mbrojtësi francez Benjamin Pavard. Për të dy futbollistët, agjenti Federico Pastorello ka zhvilluar një takim në selinë e Interit, ku ka marrë detyrën për të gjetur oferta konkrete për transferimin e tyre.
Sipas raportimeve, Interi e vlerëson kartonin e Kristjan Asllanit me 12 deri në 15 milionë euro, shifër e njëjtë edhe për Pavardin.
Interesimi më i madh për momentin vjen nga jashtë Italisë, ndërsa klubet e Arabisë Saudite po shfaqen si një alternativë gjithnjë e më konkrete për transferimin e mesfushorit shqiptar.
Megjithatë, e ardhmja e Asllanit mbetet ende e hapur. Sipas mediave italiane, java e ardhshme pritet të jetë vendimtare për të përcaktuar destinacionin e tij të ri dhe për të kuptuar nëse 23-vjeçari do t'i japë fund aventurës me fanellën e Interit.
