Për rreth dy javë, studentët në kryeqytetin e Shqipërisë, Tiranë, kanë demonstruar çdo ditë kundër qe...
SPORT
Botërori 2027 për vajza/ Trajneri Grima: Do të bëjmë çmos për të marrë rezultat pozitiv ndaj Çekisë
PiranjatPërditësimi i fundit 5 Qershor 2026, 14:13
Kombëtarja e vajzave është gati për sfidën e nesërme ndaj Çekisë e vlefshme për kualifikueset e Botërorit 2027. Skuadra kuqezi zhvilloi pasditen e sotme stërvitjen zyrtare në stadiumin e ndeshjes, “FK Viktoria Žižkov”, nën drejtimin e stafit teknik, duke mbyllur kështu përgatitjet për takimin e rëndësishëm në Pragë.
Në një prononcim për FSHF.org, trajneri Armir Grima foli për kundërshtarin e nesërm dhe objektivat e skuadrës.
“Është ndeshje e vështirë. E njohim ekipin çek, i dimë elementët cilësorë që ka. Do të mundohemi që t’i përballojmë me mënyrën tonë më të mirë të mundshme. Është shumë e rëndësishme të punojmë nga ana psikologjike për këtë kundërshtar dhe vajzat të jenë të qeta për ta përballuar me sukses. Nuk është kundërshtar që s’mundemi ta kalojmë. Do të bëjmë çmos, deri në minutën e fundit, për të marrë rezultat pozitiv”, – tha trajneri Grima, i cili komentoi gjithashtu gjendjen e skuadrës kuqezi dhe gatishmërinë e saj për ndeshjen.
“Kemi dëmtimet dhe problemet tona, megjithatë vajzat që do të luajnë besoj se janë në formën optimale dhe pretendojmë të marrim maksimumin prej tyre. Janë të karikuara, sepse të luash për fanellën e Shqipërisë nuk është shaka. Përfaqëson një komb, ngjyrat kuqezi. Ne madje duhet ‘ta ulim pak karikimin’. Uroj të bëjmë një rezultat dhe lojë dinjitoze nesër ndaj këtij ekipi të fortë”, – nënvizoi për FSHF.org trajneri Armir Grima.
Ndeshja Çeki – Shqipëri do të luhet nesër, në orën 17:30, në stadiumin “FK Viktoria Žižkov”, në Pragë dhe është e vlefshme për kualifikueset e Botërorit 2027 për vajza. Takimi do të transmetohet drejtpërdrejt në FSHF TV.
