Sot në orën 10:00 Sekretariati i Etikës në Kuvend do të mblidhet online për të shqyrtuar kërkesën e një grup...
SPORT
Cisse feston 20-vjetorin, Milani i beson talentit që është gati të trokasë në dyert e Italisë
PiranjatPërditësimi i fundit 22 Tetor 2026, 15:51
Alphadjo Cisse po përjeton momentin më të mirë të karrierës së tij. Mesfushori me tipare sulmuese feston sot 20-vjetorin e lindjes dhe pritet të jetë titullar me Milanin në sfidën e Europa League kundër Bournemouth.
Vetëm një vit më parë, emri i tij ishte pak i njohur për publikun e gjerë, ndërsa tani është kthyer në një nga surprizat më të bukura të kuqezinjve.
Pas tregolëshit të shënuar ndaj Salzburgut në Evropë, Cisse ka fituar vëmendjen e trajnerit Ruben Amorim. Me Gonçalo Ramos të dëmtuar, talenti italian pritet të marrë një rol më të rëndësishëm në sulm, duke pasur mundësinë të tregojë se mund të luajë edhe si qendërsulmues. Ai ka kaluar gradualisht në plan të parë, duke fituar terren edhe ndaj të rinjve të tjerë të skuadrës.
Paraqitjet e tij nuk kanë kaluar pa u vënë re as nga Roberto Mancini, i cili po e ndjek me interes zhvillimin e futbollistit.
Cisse ende nuk është grumbulluar me kombëtaren e parë, por një ftesë e mundshme për ndeshjet e ardhshme të Ligës së Kombeve kundër Francës dhe Belgjikës mund të jetë hapi i radhës në karrierën e tij.
I lindur në Treviso më 22 tetor 2006, nga prindër me origjinë nga Guinea, Cisse e nisi rrugëtimin në futboll në ekipet e moshave, përpara se të tërhiqte vëmendjen e Veronës.
Ai debutoi në Serie A më 26 maj 2024, kundër Interit, ndërsa huazimi te Catanzaro në verën e vitit 2025 i dha mundësinë të fitonte përvojë dhe të tregonte potencialin e tij.
Milani siguroi më pas kartonin e tij, duke mposhtur konkurrencën e klubeve të tjera evropiane. Pas një periudhe të vështirë për shkak të dëmtimit, Cisse është rikthyer me ambicie të mëdha dhe po shfrytëzon çdo mundësi për të lënë gjurmë.
Tregolëshi ndaj Salzburgut e bëri italianin më të ri që shënon tri herë në një ndeshje të kompeticioneve evropiane, në moshën 19 vjeç e 358 ditë.
Tani, në ditëlindjen e tij të 20-të, ai synon të vazhdojë ngjitjen dhe të fitojë një vend mes emrave të rëndësishëm të Milanit, me synimin e madh për të veshur edhe fanellën e kombëtares italiane.
