Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
SPORT
FIFA zyrtarizon vendimin: Serbia–Shqipëria do të luhet me tifozë, por me kapacitet të kufizuar
PiranjatPërditësimi i fundit 30 Shtator 2025, 16:25
Është bërë zyrtare, ndeshja mes Serbisë dhe Shqipërisë, e planifikuar më 11 tetor në stadiumin "Dubocica" të Leskovcit, do të zhvillohet në praninë e vetëm 6.500 tifozëve.
Ky vendim erdhi pas shqyrtimit të Komisionit Disiplinor të FIFA-s, i cili ndëshkoi Federatën Serbe të Futbollit për incidentet e shumta gjatë ndeshjes së fundit me Anglinë në Beograd.
Në raportin e FIFA-s theksohen disa shkelje serioze: • mosgarantimi i rendit dhe sigurisë brenda e jashtë stadiumit, • përdorimi i lazerëve dhe gjesteve fyese, • ndërprerjet gjatë intonimit të himneve kombëtare, • sjellje diskriminuese nga tifozë të veçantë.
Përveç kufizimit të kapacitetit, Federata Serbe është dënuar edhe financiarisht. Stadiumi i Leskovcit ka një kapacitet prej 8.136 vendesh, por për këtë takim do të lejohen vetëm 80% e tyre.
Në sfidën kundër Anglisë, e cila përfundoi me humbjen 5–0 të Serbisë përpara 40 mijë tifozëve, u shënuan shkelje të shumta: ofendime ndaj Kosovës dhe shqiptarëve, fishkëllima ndaj himnit anglez, si dhe incidente të dhunshme nga grupe huliganësh të lidhur me pushtetin serb.
Për të shmangur përsëritjen e ngjarjeve të tilla, FIFA ka zgjedhur që ndeshja me Shqipërinë të luhet në një stadium më të vogël, duke synuar kontroll më të rreptë mbi shitjen e biletave. Sipas burimeve, një pjesë e mirë e biletave pritet t’u shpërndahen të rinjve dhe fëmijëve, si një masë parandaluese kundër dhunës.
Ndërkohë, për tifozët shqiptarë që nuk do të kenë mundësi të udhëtojnë drejt Leskovcit, Digitalb do ta transmetojë drejtpërdrejt dhe ekskluzivisht këtë sfidë të rëndësishme të kombëtares kuqezi.
