Vdekja e një gruaje 28-vjeçare që punonte në një laborator kundër murtajës në Rusi po ngre shqetësime rreth asaj ...
SPORT
Gazetari portugez zbulon kushtin e Ronaldos, 41-vjeçari nuk rikthehet në kombëtare nëse…
PiranjatPërditësimi i fundit 6 Tetor 2026, 17:33
Cristiano Ronaldo raportohet se nuk ka ndërmend të rikthehet te kombëtarja e Portugalisë për sa kohë Jorge Jesus do të jetë në krye të saj.
Pretendimi vjen pas zhvillimeve të fundit në kampin e Portugalisë, ku sulmuesi 41-vjeçar u la në stol në ndeshjen ndaj Norvegjisë dhe më pas u largua nga grumbullimi i kombëtares.
Ronaldo nuk u aktivizua në fitoren 2-1 të Portugalisë më 27 shtator, në atë që ishte hera e parë në 18 vjet që ai nuk zbriste në fushë për vendin e tij, edhe pse ishte i gatshëm për të luajtur.
Pas kësaj, ai mungoi në tri seanca stërvitore dhe më pas u largua nga grumbullimi, duke mos marrë pjesë as në dy ndeshjet e fundit të Portugalisë gjatë këtij pushimi ndërkombëtar.
Jorge Jesus e ka lënë derën hapur për rikthimin e yllit të Al-Nassr në kombëtare, duke deklaruar se Ronaldo do të ishte i mirëpritur sërish.
Megjithatë, gazetari portugez Rui Santos pretendon se pesë herë fituesi i “Topit të Artë” nuk ka më besim te trajneri dhe nuk dëshiron të luajë nën drejtimin e tij. Santos ka deklaruar për CNN Portugal se Ronaldo dyshohet se ka bërë të qartë se nuk do të rikthehet në kombëtare, të paktën për sa kohë Jorge Jesus mbetet trajner.
Sipas tij, Ronaldo është veçanërisht i pakënaqur me mënyrën se si është menaxhuar e gjithë situata dhe me deklaratat e bëra publikisht nga Jesus.
Një prej pikave që raportohet se e ka irrituar Ronaldon janë mesazhet e ndryshme të trajnerit. Jesus ka thënë se e pret rikthimin e tij, por në të njëjtën kohë ka theksuar se vendimet për formacionin dhe përzgjedhjen e lojtarëve i takojnë atij dhe se nuk ka asgjë për të kërkuar falje.
Në përplasjen mes palëve është përfshirë edhe Piers Morgan, gazetari britanik që ka intervistuar më herët Ronaldon. Morgan ka akuzuar Jesusin se nuk e ka mbajtur një premtim ndaj sulmuesit portugez dhe e ka krahasuar situatën me marrëdhënien e tensionuar që Ronaldo kishte me Erik ten Hag te Manchester United.
Ronaldo ende nuk ka bërë të ditur publikisht arsyen e plotë që e çoi drejt largimit nga grumbullimi i fundit i Portugalisë. Pas largimit, ai u uroi shokëve të skuadrës sukses dhe tha se do ta tregojë “të vërtetën” për vendimin e tij në kohën e duhur.
Pas largimit të Ronaldos, Portugalia ka vazhduar rezultatet pozitive nën drejtimin e Jorge Jesus, duke fituar të katërta ndeshjet e zhvilluara që prej emërimit të trajnerit në korrik.
