Në fund të shtatorit, kryeministri Edi Rama paralajmëroi se telefoni celular nuk mund të trajtohej më si një derë e hapur p...
SPORT
Ish-portieri legjendar i SHBA-së, Tim Houard demoralizon lojtarët: E pamundur që të fitojmë Kupën e Botës
PiranjatPërditësimi i fundit 22 Qershor 2026, 15:29
Ish-portieri legjendar i kombëtares së Shteteve të Bashkuara, Tim Houard, nuk beson se SHBA-ja ka shanse reale për të fituar Kupën e Botës 2026, pavarësisht se ka fituar dy ndeshjet e para në fazën e grupeve kundër Paraguait dhe Australisë. Në podcastin e tij “Unfiltered Soçer”, së bashku me ish-shokun e skuadrës Landon Donovan, Houard u shpreh skeptik për aftësinë e amerikanëve që të vazhdojnë suksesin edhe në fazat eliminatore.
“SHBA-ja nuk mund ta fitojë Kupën e Botës, pa asnjë dyshim”, tha Houard. “Për ta bërë këtë, kombëtarja amerikane duhet të luajë ndeshjen më të mirë në historinë e saj… katër herë radhazi, në 1/16-at, çerekfinale, gjysmëfinale dhe finale.” Ai shtoi: “Është fjalë për fjalë e pamundur që SHBA-ja të fitojë Kupën e Botës. Kjo është thjesht realiteti.”
Në dy ndeshjet e para të Grupit D, SHBA-ja mposhti Paraguain me rezultatin 4-1 dhe Australinë 2-0. Në të dyja sfidat amerikanët u shfaqën të sigurt dhe dominues, por kundërshtarët nuk ishin mes ekipeve elitare të futbollit botëror, diçka që pritet të ndryshojë në fazën me eliminim direkt. Donovan u tregua disi më optimist për ecurinë e kombëtares amerikane, por në fund ra dakord me përfundimin e Houard.
“A mundemi? Po. A ka provuar ky grup se mund të mposhtë një ekip të madh? Jo”, tha Donovan. “Nëse vazhdojnë të luajnë kështu, mund të konkurrojnë me çdo skuadër në këtë Kupë Bote. Pa diskutim.” Megjithatë, ai theksoi se sfida më e madhe është vazhdimësia. “Mund ta bësh një herë, por a mund ta bësh katër herë radhazi? Në 1/16-at, çerekfinale, gjysmëfinale dhe finale. Pikërisht aty bëhet shumë e vështirë. Por kur krijon vrull pozitiv, nuk i dihet kurrë”, tha.
SHBA-ja e ka siguruar tashmë kalimin në fazën me eliminim direkt falë dy fitoreve të para, por ka ende një ndeshje për të luajtur në grup. Amerikanët do të përballen me Turqinë të enjten në stadiumin “SoFi Stadium”, në Los Anxhelos. Ndërkohë, ylli i skuadrës, Kristian Pulisiç, i cili mungoi ndaj Australisë për shkak të një dëmtimi në pulpë, mund të jetë i gatshëm për ndeshjen kundër Turqisë. Gjithsesi, duke qenë se kualifikimi është siguruar tashmë, stafi teknik mund të vendosë t’i japë më shumë kohë për t’u rikuperuar plotësisht.
