Një shtetas shqiptar është dënuar me burg për rolin e tij si kultivues në një fermë kanabisi me vlerë 4.5 milion&eu...
SPORT
Kupa e Shqipërisë/ Finale e parakohshme, në Elbasan zbresin “Demat”
PiranjatPërditësimi i fundit 11 Shkurt 2026, 14:11
Partizani luan sot ndeshjen e parë të Kupës së Shqipërisë ndaj Elbasanit, takim ky që do të nisë prej orës 16:30 në stadiumin “Elbasan Arena”, i vlefshëm për fazën çerekfinale të kompeticionit të dytë për nga rëndësia në Shqipëri.
Të kuqtë e kanë shndërruar Kupën në një objektiv kryesor për këtë sezon, teksa e shohin si rrugën më të shkurtër për të prekur Kupat e Europës, duke qenë se në kampionat rivaliteti është shumë i lartë dhe aktualisht skuadra mban vendin e pestë, me pesë pikë larg Dinamos së katërt në tabelën e klasifikimit. Në këtë situatë, kryeqytetasit synojnë të shfrytëzojnë maksimalisht çdo ndeshje në këtë kompeticion, duke e konsideruar Kupën si një mundësi të rëndësishme për vazhdimësinë e sezonit.
Nga ana tjetër, sezoni për Elbasanin po ecën me ritme shumë të mira dhe, pas sukseseve në kampionat, do të tentojë vazhdimësinë edhe në Kupë, me organikën e gjerë që i lejon trajnerit Ivan Gvozdenoviç të tentojë dhe t’i shkojë Kupës deri në fund. Verdheblutë kanë treguar stabilitet në lojë dhe rezultate, duke u paraqitur të organizuar në të dy fazat e lojës gjatë gjithë këtij sezoni. Për t’u rikthyer te përballja mes dy skuadrave, kryeqytetasit në këtë sezon nuk gëzojnë një bilanc pozitiv ndaj verdhebluve. Në tre ndeshjet e zhvilluara në kampionat përgjatë këtij sezoni, Partizani nuk ka mundur të fitojë asnjë ndeshje përballë Elbasanit. Të kuqtë regjistrojnë një disfatë dhe dy barazime ndaj Elbasanit në këtë sezon, i fundit ai më dramatiku, 2-2, në sfidën e luajtur në “Arena e Demave”, përballje e cila u karakterizua nga ritëm i lartë dhe raste të shumta shënimi.
Një lajm pozitiv për “Demat” është rikthimi në dispozicion i kapitenit David Atanaskoski, si dhe rikthimi nga pezullimi prej kartonëve i Xhuliano Skukës, me të dy që do të jenë nën urdhrat e trajnerit Oltijon Kërnaja. Prania e tyre pritet të shtojë alternativat në formacion për këtë takim. Në këtë fazë të kompeticionit, Partizani dhe Elbasani mbërritën duke eliminuar respektivisht Burrelin dhe Flamurtarin. Të dyja ekipet synojnë të sigurojnë një rezultat pozitiv në ndeshjen e parë, përpara takimit të kthimit, pasi sic duhet në tilla sfida me sistem vajtje-ardhje, llogaria është përcaktuese për kualifikimin. Përballja në “Elbasan Arena” pritet të zhvillohet në një atmosferë sportive dhe me interes nga tifozët vendas që në këtë sezon kanë qenë gjithnjë të shumtë në shkallët e stadiumin.
