“Mos e prek Memaliajn!” Me këtë mesazh dhe pankarta në duar, banorë të Memaliajt dolën në aksin kryesor që l...
SPORT
Lara Kolturi zhgënjen në sllallom, Shifrin shkruan historinë
PiranjatPërditësimi i fundit 25 Mars 2026, 11:06
Kupa e Botës në ski alpine është zhvendosur për ndalesën e fundit sezonale në Lillehammer të Norvegjisë, një event që tërheq interes të veçantë edhe për Shqipërinë që përfaqësohet nga Lara Kolturi, e cila dje konkurroi në disiplinën e sllallomit.
Por, vajza e talentuar italiane që mbron ngjyrat kuqezi nuk ia doli që të linte gjurmë, duke mbyllur një sllallom anonim në vendin e 16-të. E nisur e treta në garë, Lara u klasifikua në vendin e 10-të në zbritjen e parë, duke fiksuar kohën 1:10.13. Më tej në zbritjen e dytë rezultati ishte më i dobët, pasi skiatorja kuqezi u klasifikua e parafundit (vendi i 22-të) me kohën 1:00.97.
Kështu me rezultatin e përgjithshëm 2:11.10, Kolturi e përfundoi sllallomin e Norvegjisë në vendin e 16-të me diferencë +3.46 nga fituesja e garës, amerikania Mikaela Shifrin. Kjo e fundit vijon të shkruajë historinë e Kupës së Botës, duke vijuar të jetë lidere e kompeticionit prestigjioz.
Shifrin arriti një fitore historike, duke triumfuar për herë të nëntë në sllallom gjatë këtij sezoni, në finalen e Kupës së Botës. Kjo fitore ishte gjithashtu e 110- ta në total në Kupën e Botës për yllin amerikan të skive, duke zgjeruar rekordin e saj. Tashmë Shiftin pret të finalizojë me sukses për të siguruar Globin e Madh të Kristaltë. Podiumi i garës së djeshme në sllallom u kompletua nga zvicerania Uendi Holderer (+1.32) dhe gjermania Ema Aisher (+1.36), e cila mbetet deri në fund në lojë për titullin botëror. Për sa i përket klasifikimit të përgjithshëm në Kupën e Botës, Shifrin kryeson me 1386 pikë, ndjekur nga Aisher me 1301 pikë dhe zvicerania Kamil Rast me 1009 pikë.
Ndërkohë, Lara Kolturi vijon të distancohet nga dhjetëshja e parë, ndërsa tashmë ka rrëshqitur në vendin e 15-të në renditjen e përgjithshme, por 19- vjeçarja mund të krenohet me vendin e parë në radhët e të rejave. Një rezultat i madh për të dhe për Shqipërinë e skive, që për herë të parë sheh një sportiste kuqezi të garojë në nivele kaq të larta në elitën botërore. Lara e dha më të mirën e saj në sllallom, disiplinë të cilën e përfundoi e shtata në botë këtë sezon. Kupa e Botës 2025-2026 do ta ulë sot siparin me disiplinën e sllallomit gjigant, teksa në orën 09:30 do të behet zbritja e parë, ndërsa në orën 12:30 do të nisë lëshimi i dytë.
