Ylli Zalla, i shpallur në kërkim për posedim të një arsenali armësh dhe i dyshuar për përfshirje në atentatin e R...
SPORT
Mes Ligës së Kampioneve dhe merkatos, Interi luan për gjithçka në Dortmund
PiranjatPërditësimi i fundit 28 Janar 2026, 11:23
Tri humbje radhazi në Champions League, një rast unik në historinë europiane të Interit, kanë ndryshuar rrënjësisht skenarin e zikaltërve. Vetëm pak javë më parë, skuadra e drejtuar nga Kivu ishte brenda “Top 8”, zonë që garanton kualifikimin direkt në 1/8 e finales pa kaluar nga playoff-i.
Sot, në prag të sfidës kundër Borusia Dortmund, situata është shumë më e ndërlikuar. Ndeshja e sotme në Gjermani do të jetë vendimtare për të kuptuar nëse Interit do t’i duhet të kalojë nga dy përballjet shtesë të shkurtit, më 17/18 dhe 24/25, apo nëse do të arrijë një kualifikim direkt që do t’i lejonte të përqendrohej përkohësisht vetëm te kampionati dhe objektivat vendas.
Një detaj jo i vogël, sidomos në funksion të garës për titull, me kalendarin e ngjeshur dhe Kupën e Italisë që e pret në fillim të shkurtit. Pa llogaritur edhe ndikimin që këto rezultate do të kenë në strategjinë e merkatos, ku Kivu ka kërkuar përforcime në krahun e djathtë.
INTER, 1/8 FINALE APO PLAYOFF: ÇFARË THONË STATISTIKAT Numrat flasin qartë: Interi ka vetëm 6,31% shanse për t’u kualifikuar direkt në 1/8 e finales pa kaluar nga playoff-i. Një përqindje që e përshkruan më së miri vështirësinë e misionit në Dortmund. Megjithatë, nga pikëpamja matematike, nuk bëhet fjalë për një sfidë “brenda ose jashtë”, pasi sido që të përfundojë ndeshja, zikaltërit nuk rrezikojnë eliminimin e menjëhershëm. Sigurisht, një pozicion më i favorshëm në renditjen përfundimtare do të garantonte, të paktën teorikisht, një kundërshtar më të përballueshëm në playoff, edhe pse Champions League ka treguar shpesh se surprizat janë pjesë e saj.
VARIABLA CHAMPIONS NË GARËN PËR TITULL Nga ana tjetër e Milanos, sponda kuqezi, situata ndiqet me vëmendje. Milani shpreson që ai 93,69% probabilitet që Interi të shkojë në playoff të bëhet realitet. Dy ndeshje më shumë në këmbët e rivalëve do të ishin një avantazh i rëndësishëm për kuqezinjtë, të cilët, ndonëse zyrtarisht flasin për objektivin Champions, me 21 rezultate radhazi pa humbje kanë fituar bindjen për të ëndërruar edhe titullin. Nëse deri te derbi i 8 marsit diferenca mes skuadrave mbetet e pandryshuar ose zvogëlohet, pritet një përballje qyteti jashtëzakonisht e zjarrtë. Për këtë arsye, për Interin fitorja në Dortmund do të ishte ideale: “Top 8”, fokus te kampionati dhe më pak ngarkesë fizike në një moment kyç të sezonit.
INTER-PERISIÇ, PISTA QË VARET NGA EUROPA Në sfond mbetet edhe një tjetër “ndeshje”, ajo që luhet në Eindhoven mes PSV-së dhe Bajernit të Mynihut. Nëse holandezët, aktualisht në vendin e 22-të të fazes së ligës, do të mbeteshin jashtë Champions League, atëherë rikthimi i Ivan Perisiç në Milano do të merrte formë konkrete. Një pistë merkatoje që lidhet drejtpërdrejt me fatin europian të Interit dhe që mund të ndizet në ditët në vijim.
