Grupi politik Partia Demokratike Evropiane ka reaguar ndaj deklaratave të Edi Ramës në intervistën e tij për Financial Times, ku shau...
SPORT
Në Berat i shuan ëndrrën si portier, tani në moshën 31-vjeçare është i kërkuar si trajner
PiranjatPërditësimi i fundit 21 Janar 2026, 14:59
Edhe pse potenciali dhe dëshira e tij premtonin një karrierë të gjatë dhe të suksesshme si futbollist, ish-portieri i njohur beratas Josel Shtrepi u detyrua të mbyllë shumë herët kapitullin e futbollit aktiv. I formuar te Shkëndija e Tiranës, ku hodhi bazat e një portieri modern, Shtrepi u aktivizua më pas edhe me Tomorin dhe Lushnjën, por rrethana të ndryshme e shtynë të largohej nga fusha në një moshë fare të re.
Megjithatë, largimi nga futbolli nuk do të thoshte ndarje nga pasioni. Përkundrazi, Shtrepi vendosi të qëndrojë pranë lojës, duke iu përkushtuar një roli po aq të rëndësishëm, përgatitjes së portierëve. Pas ndjekjes së disa kurseve specializimi dhe një pune të vazhdueshme në aspektin profesional, sot, në moshën 31-vjeçare, ai vlerësohet si një nga trajnerët e portierëve më seriozë dhe më të kërkuar në kampionatet shqiptare, në të gjitha kategoritë. Aktualisht, Josel Shtrepi është pjesë e stafit teknik të Sopotit, ku ushtron detyrën e përgatitësit të portierëve. Ai ishte i pranishëm edhe në ndeshjen miqësore të zhvilluar fundjavën e kaluar ndaj Tomorit në Berat, një përballje me ngarkesë emocionale për të, duke qenë se bëhej fjalë për skuadrën e vendlindjes. Në një prononcim për “Panorama Sport”, Shtrepi ndalet gjatë te filozofia e tij e punës dhe rëndësia që ka roli i portierit në futbollin modern. Sipas tij, portieri nuk është thjesht lojtari i fundit i mbrojtjes, por një element kyç në ndërtimin e lojës dhe ekuilibrin e skuadrës.
Prononcimi- “Futbolli luhet me 11 lojtarë, por portieri mbetet gjysma e ekipit. Për këtë arsye, përgatitja e tij duhet të jetë e gjithanshme, teknike, fizike dhe mendore. Talenti, sado i madh të jetë, zhvillohet vetëm përmes punës së përditshme dhe disiplinës. Ky është misioni i trajnerit të portierëve dhe këtë rol e kam përqafuar menjëherë pasi u largova nga fusha”, shprehet Shtrepi. Ish-portieri beratas nuk e fsheh keqardhjen për mënyrën se si u mbyll karriera e tij si futbollist, duke theksuar mungesën e mbështetjes te Tomori, skuadra e vendlindjes, në një moment vendimtar. Ai kujton me respekt vitet e formimit te Shkëndija e Tiranës dhe trajnerët që kanë ndikuar në rritjen e tij, mes të cilëve veçon Shpendi Kumbarçen. Hapat e parë si trajner i portierëve i hodhi te një akademi private, ku punoi krah emrave të njohur të futbollit shqiptar si Alban Bushi dhe Redi Jupi. Më pas, rrugëtimi i tij profesional vijoi te Apolonia, nën drejtimin e trajnerëve të respektuar Artan Mërgjyshi dhe Nikolin Çoçlli, ku punoi me portierë të nivelit të lartë si Harizaj dhe Leonard Kaçaj, duke fituar përvojë dhe besim në punën e tij.
“Te Sopoti gjeta një projekt serioz, një klub të organizuar dhe një ambient shumë pozitiv. Objektivi është i qartë, ngjitja në Kategorinë e Parë, dhe grupi ka cilësi për ta realizuar. Kënaqësia dhe përgjegjësia janë të mëdha, por edhe motivimi është maksimal”, thekson Shtrepi. Në planin personal, ambiciet e tij janë të mëdha, por realiste. Ai synon që në një të ardhme të afërt të jetë pjesë e një skuadre të njohur të Superiores, ndërsa ëndrra më e madhe mbetet angazhimi me përfaqësueset kombëtare të moshave. “Do të ishte kulmi i karrierës sime si trajner të kontribuoja për ekipet kombëtare. Një dëshirë tjetër e fortë është t’i shërbej një ditë Tomorit dhe ta shoh skuadrën e vendlindjes të rikthehet aty ku e meriton, larg kësaj gjendjeje të vështirë ku ndodhet sot”, përfundon Josel Shtrepi.
