Policia e Tiranës ka filluar verifikimin e videove me përmbajtje seksuale të cilat prej ditës së djeshme po qarkullojnë në rr...
SPORT
Një Champions për Interin? Nga humbja e trofeve te rënia në kategoritë e ulëta, çfarë pritet të ndodhë me Manchester Cityn
PiranjatPërditësimi i fundit 30 Shtator 2026, 15:29
Futbolli anglez po përballet me një situatë të pazakontë pas vendimit të Komisionit të Pavarur, i cili e ka shpallur Manchester Cityn përgjegjës për mbi 100 shkelje të rregullave financiare të Premier League.
Sipas vendimit, klubi dyshohet se ka përdorur kontrata dhe marrëveshje të ndryshme komerciale për të rritur artificialisht të ardhurat dhe për të ulur kostot me më shumë se 900 milionë paund. Gjithashtu, sipas komisionit, janë paraqitur pasqyra financiare që nuk pasqyronin situatën reale të klubit dhe janë shkelur rregullat financiare të UEFA-s dhe Premier League.
Një tjetër element i rëndësishëm i çështjes lidhet me bashkëpunimin gjatë hetimit, për të cilin City është gjetur përgjegjës për shkelje. Manchester City ka të drejtë të apelojë vendimin dhe afati për paraqitjen e apelimit përfundon më 2 tetor. Çështja do të shqyrtohet nga një komision i ri i përbërë nga tre persona.
Premier League nuk ka një dënim automatik për shkelje të tilla. Sanksionet mund të përfshijnë gjobë, zbritje pikësh apo masa të tjera disiplinore, në varësi të vendimit të autoriteteve përkatëse.
Një nga skenarët e mundshëm është edhe rënia nga kategoria nëse një penalizim me pikë do të ishte i tillë që ta zbriste Cityn në zonën e rënies. Një situatë tjetër do të ishte përjashtimi i klubit nga Premier League. Ky do të ishte ndryshe nga rënia sportive nga kategoria.
Në rast përjashtimi, Manchester City do të duhej të aplikonte për t’u rikthyer në strukturën e futbollit anglez përmes Football Association dhe English Football League (EFL). Sipas rregullave të përmendura në raportime, një klub i pranuar në këtë mënyrë do të niste në nivelin e katërt të futbollit profesionist anglez, pra në League Two.
Vendimi për pranimin e një klubi në EFL merret përmes votimit të 72 klubeve anëtare.
Çështja mund të ketë pasoja edhe për klubet e tjera të Premier League, të cilat mund të pretendojnë dëme nëse vendimi përfundimtar do të ndikonte në renditjen, trofetë apo kualifikimet evropiane të viteve të mëparshme.
Po trofetë dhe Champions League?
Në lidhje me kompeticionet evropiane, UEFA mbetet një tjetër institucion që mund të shqyrtojë situatën, por një vendim i Premier League nuk do të nënkuptonte automatikisht heqjen e trofeve evropianë të Manchester Cityt.
Në veçanti, një komision i Premier League nuk ka kompetencë të heqë trofeun e Champions League të fituar nga City në vitin 2023 përballë Interit.
Manchester City i ka mohuar akuzat dhe pritet të ndjekë procedurat e apelimit. Përfundimi i procesit do të përcaktojë nëse ndaj klubit do të vendosen sanksione dhe çfarë forme do të marrin ato.
