Detaje të reja janë mësuar në lidhje me ngjarjen në Roskovec, ku Besmir Mustaj ka qëlluar me armë zjarri në portë...
SPORT
Pazare të hapura në ''Superligën e Armando Dukës''/ Koeficentët në kufijtë e absurdit dhe llogaritë e bëra sheshit sjellin skandalin e radhës në futbollin shqiptar
PiranjatPërditësimi i fundit 2 Maj 2026, 14:48
Analiza e koeficienteve të ofruar nga kompanitë e basteve për javën e fundit të Abissnet Superiore, bazuar në dokumentin e siguruar, përbën provën më flagrante të një kampionati që ka dalë jashtë shinave të logjikës sportive.
Në një industri që bazohet në probabilitetin matematik, këto shifra nuk janë thjesht koeficiente, por një pasqyrë e paracaktimit të rezultateve në kurriz të garës së ndershme.
Paradoksi i “Gjigantëve” dhe “Të vegjëlve”
Anomalia më e rëndë shfaqet në dy përballje ku hierarkia e kampionatit përmbyset totalisht në letër:
Vora (1.43) vs AF Elbasani (7.05): Kjo është sfida ku matematika sfidon arsyen. Elbasani, i cili kryeson kampionatin, trajtohet si një autsajder i pashpresë me koeficientin 7.05, një shifër që zakonisht u caktohet skuadrave amatore në përballje me kampionët. Fakti që Vora, e cila lufton në zonën e Play-out, konsiderohet favorite absolute me 1.43, tregon se tregu i basteve ka “vërtetuar” paraprakisht se kryesuesit nuk do të luajnë për fitore.
Partizani (7.03) vs Flamurtari (1.45): Një tjetër goditje për integritetin e ligës. Partizani, si pritës dhe pretendent për “Final Four”, kuotohet me një shifër poshtëruese 7.03, ndërsa Flamurtari i vendit të fundit vjen si favorit i padiskutueshëm me 1.45. Ky përmbysje e raporteve në shtëpinë e të kuqve është dëshmia e gjallë e një skenari ku pikët “shiten” për nevojat e mbijetesës së kundërshtarit.
Mungesa e koefiçientëve: Mesazhi i alarmit
Ndeshja mes Dinamo Tiranës dhe Egnatias nuk shfaqet fare me koeficiente në listë. Ky është “alarmi i kuq” i industrisë së basteve. Kur kompanitë refuzojnë të kuotojnë një ndeshje mes kampionit në fuqi (Egnatia) dhe një pretendenti si Dinamo, ky është pranimi zyrtar i faktit se rezultati konsiderohet i komprometuar aq rëndë, saqë asnjë model matematik nuk mund të garantojë një garë të pastër.
Luhatjet e tjera dhe nevoja për “Oksigjen”
Sfidat e tjera pasqyrojnë nevojën e dëshpëruar për pikë:
Teuta (2.15) vs KF Tirana (3.15): Edhe këtu shihet një lëshim në koeficient në favor të Teutës, e cila ka nevojë emergjente për pikë. Tirana, pavarësisht emrit dhe pozicionit, trajtohet si skuadër e dorës së dytë në këtë përballje, duke reflektuar “tolerancën” e mundshme të kryeqytetasve.
Vllaznia (1.68) vs Bylis (4.40): Ky mbetet koeficienti më pranë realitetit sportiv, ku shkodranët favorizohen në shtëpi. Megjithatë, kuota 4.40 për Bylisin mbetet e ulët nëse merret parasysh diferenca e kualitetit, duke lënë derën hapur për një surprizë të “nevojshme” për ballshiotët.
Një Kampionat në “tregun e zi”
Shifrat e fundit vërtetojnë se Abissnet Superiore po mbyllet në një mjegullnajë ku fitoret nuk korren në fushë më. Kur kryesuesi i kampionatit ka të njëjtin koeficient fitorjeje si një ekip i fundit të tabelës, gara ka vdekur. Ky fund sezoni nuk po prodhon futboll, po prodhon një aritmetikë të turpshme që e kthen sportin në një farsë ku llogaritë e “miqve” peshojnë më shumë se djersa e lojtarëve./Top Channel
