Policia është përplasur me protestuesit e rinj në qendër të Tiranës pasditen e të hënës, ku dhjetëra pers...
SPORT
PSG në alarm para Barçës, mungesa e Nuno Mendes hap dilemën për Lamine Yamal
PiranjatPërditësimi i fundit 19 Tetor 2026, 14:20
Paris Saint-Germain do të përballet me Barcelonën në Ligën e Kampionëve pa Nuno Mendes. Mbrojtësi portugez pësoi një dëmtim në kofshë gjatë fitores 3-1 ndaj Strasburgut dhe pritet të mungojë për disa javë, duke humbur kështu edhe përballjen e së martës në mbrëmje, e programuar në orën 21:00.
Mungesa e tij përbën një shqetësim të rëndësishëm për trajnerin Luis Enrique, pasi Mendes është një nga lojtarët që mund të bëjë diferencën si në fazën sulmuese, ashtu edhe në mbrojtje. Përballë Barcelonës, PSG-ja duhet të gjejë një zgjidhje për të frenuar Lamine Yamal, një nga rreziqet kryesore të katalanasve në krah.
Kush do të zëvendësojë Nuno Mendes?
Lucas Digne nuk është domosdoshmërisht alternativa e parë për të marrë vendin e portugezit. Edhe pse ishte në fushë nga minuta e parë ndaj Strasburgut, ai u zëvendësua nga Mendes në minutën e 53-të, ndërsa dëmtimi i këtij të fundit e ka komplikuar situatën para sfidës europiane.
Në garë për një vend në formacion janë edhe Lucas Hernandez dhe Warren Zaïre-Emery, të cilët mund t’i ofrojnë trajnerit francez zgjidhje të ndryshme për të përballuar lojën e Barcelonës. Vendimi përfundimtar do të varet nga zgjedhjet taktike të Luis Enriques dhe mënyra se si ai synon të kufizojë hapësirat për Yamal.
Një mungesë në momentin e gabuar
Nuno Mendes kishte pasur një ngarkesë të konsiderueshme në ditët e fundit. Pas pushimit shtesë para transfertave ndaj Manchester Cityt dhe Strasburgut, ai u aktivizua në pjesën e dytë të ndeshjes së kampionatit, por u detyrua të largohej nga fusha në minutën e 86-të, pak pas golit të dytë të PSG-së.
Skuadra pariziene e mbylli takimin me dhjetë lojtarë, ndërsa tani duhet të përgatitet për një sfidë edhe më të vështirë, ndaj një kundërshtari që mund ta shfrytëzojë çdo hapësirë në krahë.
Për Luis Enriquen, sfida nuk është vetëm të gjejë zëvendësuesin e Mendes, por edhe të zgjedhë lojtarin që mund t’i përgjigjet më mirë shpejtësisë dhe aftësive individuale të Lamine Yamal. Kjo zgjedhje mund të rezultojë vendimtare në një përballje ku çdo detaj taktik ka rëndësi.
