Në përgjigje të diskutimit të nxitur nga rasti i George Mazonakis dhe referenca ndaj plazmaferezës, Profesori i Terapi...
SPORT
Rikthehen betejat, java e 18-të ndez sërish Kategorinë e Parë
PiranjatPërditësimi i fundit 17 Janar 2026, 08:53
Pas pushimit dimëror, Kategoria e Parë rikthehet këtë fundjavë me javën e 18- të, duke hapur zyrtarisht kapitullin e dytë të sezonit 2025–2026. Dymbëdhjetë skuadrat janë gati të hyjnë në 16 javët vendimtare të sezonit të rregullt, ku çdo pikë do të peshojë dyfish në garën për ngjitjen dhe mbijetesën.
Pjesa e parë u mbyll me dominimin absolut të Skënderbeut, që kryeson renditjen me autoritet, ndërsa Laçi dhe Pogradeci vijojnë një duel të fortë “dhëmbë për dhëmbë” për vendin e dytë. Merkatoja e dimrit ka sjellë lëvizje të shumta, me afrime dhe largime që pritet të ndikojnë drejtpërdrejt në ecurinë e skuadrave. Vëmendje e veçantë për debutimin e trajnerit Artan Bano në krye të Lushnjës, ndërsa Kukësi vazhdon ende pa një trajner zyrtar, duke u menaxhuar nga një staf kujdestar. Java e 18-të ofron përballje interesante, ku spikasin sfida direkte për zonën “play off” dhe duele delikate në fundin e tabelës. Rikthimi i kampionatit sjell pritshmëri të larta, rivalitet të fortë dhe ndeshje që mund të ndikojnë drejtpërdrejt në fatin e sezonit. Me tabelën e ngjeshur dhe objektivat e qarta, java 18 pritet të vendosë tonin e gjithë fazës së dytë.
LAÇI – KUKËSI (13:30) Laçi e nis pjesën e dytë të sezonit nga vendi i dytë, me synimin e qartë për të qëndruar në zonën e sigurt të ngjitjes. Përballë ka një Kukës në vështirësi të thellë, të fundit në renditje dhe me probleme të dukshme organizative. Në letër, bardhezinjtë janë favoritë absolutë, por presioni për fitore mund të jetë një armë me dy tehe.
POGRADECI – BESA (13:30) Pa diskutim, ndeshja e javës. Dy skuadra që e mbyllën pjesën e parë në formë pozitive dhe që ndajnë objektiva të njëjta. Pogradeci kërkon të mbrojë vendin e tretë dhe të konfirmohet si pretendente serioze, ndërsa Besa vjen për të marrë pikë të arta në një transfertë të vështirë. Një duel që premton intensitet, ritëm dhe rivalitet të fortë.
ILIRIA – KASTRIOTI (13:30) Derbi i Krujës zhvendoset në Luz të Vogël të Kavajës, për shkak të dënimit të Ilirisë, e cila do të luajë si pritëse 50 km larg Fushë-Krujës deri në fund të sezonit. Një sfidë me peshë emocionale dhe klasifikimi, ku Kastrioti kërkon vazhdimësinë, ndërsa Iliria pikë jetike për t’u shkëputur nga zona e rrezikut.
LUSHNJA – KORABI (13:30) Sytë janë te pankina verdhejeshile, ku Artan Bano debuton si trajner i Lushnjës. Përballë një Korabi të ekuilibruar dhe të rrezikshëm, vendasit synojnë një nisje të re psikologjike. Një ndeshje ku rezultati do të tregojë nëse “efekti trajner” do të ndihet që në javën e parë në “Rozha Haxhiu”.
BURRELI – APOLONIA (13:30) Dy skuadra me pikë të barabarta dhe objektiva të ngjashme për mesin e tabelës. Burreli kërkon të shfrytëzojë faktorin fushë, ndërsa Apolonia vjen për të konfirmuar stabilitetin e saj. Një përballje e hapur, ku detajet mund të bëjnë diferencën.
SKËNDERBEU – LUFTËTARI (16:00) Kryesuesit e Skënderbeut presin Luftëtarin në Korçë, me synimin për të vazhduar marshimin e pandalshëm. Diferencat në renditje janë të mëdha, por futbolli ka treguar se surprizat nuk përjashtohen. Gjithsesi, çdo rezultat tjetër përveç fitores do të ishte befasi për vendasit.
