Dy reparte ushtarake, konkretisht ai 3001 dhe 1001 kanë një plan investimesh prej 25.7 miliardë lekësh ose 271 milionë eurosh nga bux...
SPORT
Shtyhet finalja e titullit në Kategorinë e Parë, Skënderbeu e pret Laçin ditën e hënë në Korçë
PiranjatPërditësimi i fundit 28 Prill 2026, 14:47
Kampionati i rregullt i sezonit 2025-2026 në Kategoria e Parë ishte parashikuar të mbyllej i gjithi më 3 maj, me të gjitha ndeshjet e javës së 33-të që do të luheshin në orën 15:00. Megjithatë, axhenda e javës përmbyllëse ka pësuar ndryshime, për t’i dhënë rëndësinë e merituar finales për titullin kampion. Ndeshja mes Skënderbeu Korçë dhe KF Laçi, e cila do të vendosë skuadrën kampione të Kategorisë së Parë, është shtyrë me një ditë.
Në vend që të luhet më 3 maj, siç ishte planifikuar fillimisht, takimi do të zhvillohet më 4 maj në orën 17:00. Ky ndryshim është bërë për t’i dhënë vëmendjen e duhur ceremonisë së dorëzimit të trofeut, pasi kjo sfidë nuk ndikon në renditjen finale të skuadrave të tjera të kampionatit. Për këtë arsye, federata dhe klubi kanë vendosur që ndeshja të luhet e vetme, duke krijuar një atmosferë festive dhe duke pritur një numër të madh tifozësh në shkallët e stadiumit.
Njoftimi- Klubi korçar ka bërë edhe njoftimin zyrtar për këtë finale të shumëpritur: “Finalja e madhe! Ditën e hënë, më 4 maj, ora 17:00, kurorëzohet fituesi i Kategorisë së Parë, titull që duhet të jetë në ‘sirtarët’ e qytetit të Korçës. Kjo ka nevojë edhe për ndihmën tuaj, ndaj të gjithë të jemi në mbështetje të ekipit të zemrës, për të mbyllur një vit kalendarik të suksesshëm dhe për të parë larg, aty ku e meritojmë, lart!”
Skënderbeu Korçë do të zbresë në fushë ndaj KF Laçi me objektivin e qartë për të fituar titullin kampion dhe për ta kurorëzuar rikthimin në elitën e futbollit shqiptar. Skuadra korçare pritet të paraqitet me formacionin më të mirë të mundshëm, duke synuar jo vetëm trofeun, por edhe shpërblimin financiar prej 20 milionë lekësh që akordon Federata Shqiptare e Futbollit për skuadrën kampione të kësaj kategorie. Nën drejtimin e trajnerit Ernest Gjoka, bardhekuqtë po përgatiten normalisht për këtë përballje dhe grupi është i plotë, pa mungesa për shkak dëmtimesh apo pezullimesh. Gjendja morale dhe psikologjike në ekip është shumë e mirë, ndërsa futbollistët janë maksimalisht të motivuar për ta mbyllur sezonin me triumf. Në Korçë gjithçka është gati për festën e madhe. Pas një sezoni të gjatë dhe të suksesshëm, Skënderbeu është vetëm 90 minuta larg kurorëzimit, ndërsa tifozët bardhekuq presin që skuadra e zemrës të rikthehet në elitë me trofe në duar dhe me një fitore që do të vuloste një rikthim madhështor.
