Një prej protestuesve të mbledhur para zyrave të EULEX-it në Fushë-Kosovë ka reaguar me lot në sy pas vendimit të Gjyk...
SPORT
Strakosha, Uzuni, Ajeti dhe Kumbulla mungojnë për ndeshjet e shtatorit
PiranjatPërditësimi i fundit 16 Shtator 2026, 14:56
Trajneri Maran nuk do të ketë të gatshëm të paktën 4 lojtarë për ndeshjet e shtatorit. Strakosha, Uzuni, Ajeti dhe Kumbulla, të cilët kanë qenë shpesh titullar me Silvinjon, janë të dëmtuar dhe nuk do të luajnë me Bjellorusinë dhe San Marinon. Lajm pozitiv është rikthimi në fushë i Medon Berishës.
Kombëtarja shqiptare përballet me disa probleme fizike në prag të ndeshjeve të Ligës së Kombeve. Thomas Strakosha, Myrto Uzuni dhe Arlind Ajeti pritet të mungojnë për shkak dëmtimesh, ndërsa Marash Kumbulla mbetet në dyshim për shkak të gjendjes fizike.
Situata është veçanërisht e ndjeshme në prapavijë dhe në portë, ku mungesa e Strakoshës hap garën për vendin e titullarit mes alternativave të tjera. Në mbrojtje, mungesa e Ajetit dhe pasiguria rreth Kumbullës i japin trajnerit Rolando Maran një tjetër dilemë përpara fillimit të aventurës në Ligën e Kombeve.
Në krahun tjetër, lajmet janë më pozitive për repartin ofensiv. Rei Manaj dhe Ernest Muçi pritet të rikthehen në Kombëtare, ndërsa forma e mirë e disa prej sulmuesve të tjerë i jep Maranit alternativa për të kompensuar mungesën e Uzunit. Në formë mjaft të mirë është edhe Seferi që ka shënuar 7 gola deri tani. edhe Asani ka bërë paraqitje pozitive në fillim sezon duke shënuar në dy ndeshjet e fundit.
Ndërkaq, në fushë është rikthyer edhe Medon Berisha me Lecen. Maran ka kështu një tjetër alternativë për mesfushën. Lista zyrtare e futbollistëve të grumbulluar do të publikohet më 18 shtator, në të njëjtën kohë me konferencën e parë për shtyp të Maranit për këtë grumbullim.
Seanca e parë stërvitore është programuar për 21 shtator, ndërsa Shqipëria do ta nisë Ligën e Kombeve më 26 shtator ndaj Bjellorusisë në “Air Albania”.
