Kreu i degës së Partisë Demokratike në Krujë, Aulon Kalaja, ka denoncuar publikisht presione të dyshuara të policisë n...
SPORT
Zarko kujton aksidentin e rëndë: U bllokova dhe bërtisja nga dhimbja
PiranjatPërditësimi i fundit 20 Maj 2026, 18:09
Johan Zarko tashmë është kthyer në Francë, pasi la spitalin e përgjithshëm të Katalonjës, ku mori trajtim pas aksidentit të rëndë gjatë Çmimit të Madh të Katalonjës në MotoGP. Francezi ka dëmtime në ligamentet e gjurit të majtë dhe ka vizituar një specialist që ka trajtuar edhe futbollistë të njohur si Kilian Mbape.
Piloti i LCR Honda tregoi për gazetën “L’Equipe” detaje nga incidenti. “Ishte më shumë frikë sesa dëmtim”, u shpreh francezi. Veterani zbuloi se ishte ende “i tronditur” nga aksidenti i parë, ai i Aleks Markezit. “Këmbën e kisha bërë vjollcë”, rrëfeu Johani. “Më vendosën akull mbi mavijosjen dhe dhimbja u qetësua disi. Pikërisht aty duhej të kisha vendosur të tërhiqesha nga pjesa tjetër e garës. Mes pamjeve të rrëzimit të Aleksit dhe goditjes në këmbën time, nuk ndihesha mirë fare. Nuk isha më i përqendruar kur u rikthyem në start. Pendohem që mora pjesë në nisjen e dytë”, pranoi piloti.
Zarko tregoi edhe mënyrën se si e përjetoi aksidentin pas nisjes së dytë në Montmelo. “U gjenda i bllokuar pas Marinit dhe nuk arrita të frenoja në kohë për ta shmangur”, shpjegoi ai. Më pas, ai mbeti i ngecur te motori Dukati i Françesko Banjajas. “U hodha bashkë me motorin e tij dhe këmba ime e majtë mbeti e bllokuar mes rrotës, sediljes dhe tubit të shkarkimit. Isha i ngecur në zhavorr, duke bërtitur nga dhimbja. Këmba më digjte dhe të gjithë ata që afroheshin kishin frikë të më preknin nga frika se mos ma përkeqësonin dëmtimin. Pastaj e tërhoqa vetë këmbën dhe më në fund arritën të më ndihmonin”, kujtoi ai.
Francezi tha se nuk kishte kaluar kurrë diçka të ngjashme. “Më imobilizuan, më hapën kostumin dhe më vendosën serum për të lehtësuar dhimbjen… Nuk më kishte ndodhur kurrë diçka e tillë dhe ishte vërtet e frikshme”, përfundoi ai. Skuadra LCR Honda bëri të ditur se, pas vizitës te doktori Bertrand Sonnery-Cottet në Lion, Zarko duhet të presë rreth dy javë përpara se t’i nënshtrohet operacionit për dëmtimet në ligamentet e gjurit. Më pas do të vlerësohen afatet për rikthimin e tij në pista.
