Një seri manovrash janë përdorur nga Belinda Balluku, për të përfituar një vilë luksoze me pishinë në një...
SPORT
Zbuloni të gjitha kombëtaret e kualifikuara zyrtarisht në Botërorin 2026
PiranjatPërditësimi i fundit 19 Nëntor 2025, 07:57
Botërori 2026 po merr formë, teksa një numër i madh kombëtaresh nga të gjitha konfederatat kanë siguruar matematikisht biletën për turneun më prestigjioz të futbollit. Me formatin e ri dhe zgjerimin në 48 skuadra, gara ka qenë më e ashpër, por disa prej fuqive tradicionale dhe surprizave të këndshme kanë vulosur pjesëmarrjen e tyre.
Kontinenti aziatik ka prodhuar tetë të kualifikuara: Australi, Iran, Japoni, Jordani, Katar, Arabi Saudite, Kore e Jugut dhe Uzbekistan. Gjigantët si Japonia dhe Koreja e Jugut e siguruan kualifikimin pa shumë vështirësi, ndërsa surpriza më e madhe mbetet Jordania, e cila po përjeton periudhën më të artë të futbollit të saj.
Nga Amerika e Veriut dhe Qendrore, tre skuadrat pritëse të Botërorit e kanë kryer misionin: SHBA, Kanada dhe Meksikë.
Të tria do të synojnë të shfrytëzojnë avantazhin e terrenit vendas për një paraqitje historike.
Afrika paraqitet me një grup shumë konkurrues e të balancuar:
Algjeri, Kepi i Gjelbër, Egjipt, Gana, Bregu i Fildishtë, Marok, Senegal, Afrika e Jugut dhe Tunizi. Maroku, gjysmëfinalist në Katar 2022, shkon drejt Botërorit me statusin e një force të madhe, ndërsa Kepi i Gjelbër është ndër historitë më të bukura të kualifikimeve.
Si zakonisht, Amerika e Jugut sjell emrat më të mëdhenj: Argjentinë, Brazil, Kolumbi, Ekuador, Paraguai dhe Uruguai. Argjentina kampione bote dhe Brazili do të jenë sërish pretendentë seriozë, ndërsa Paraguai rikthehet në skenën e madhe pas viteve mungesë.
Nga Oqeania, e kualifikuara e vetme e konfirmuar është: Zelanda e Re, e cila mbetet e pathyeshme në rajon dhe kërkon më në fund kalimin e një faze të avancuar në Kupën e Botës.
Kontinenti i vjetër sjell një listë të jashtëzakonshme skuadrash: Austri, Belgjikë, Kroaci, Angli, Francë, Gjermani, Holandë, Norvegji, Portugali, Skoci, Spanjë dhe Zvicër.
Të gjitha kombëtaret elitare europiane do të jenë të pranishme, me Norvegjinë që kthehet në një Botëror falë gjeneratës së re të udhëhequr nga lojtarë të nivelit botëror. Surpriza e mbrëmjes ishte natyrisht dhe kualifikimi dramatik i Skocisë në ndeshjen e fundit duke i “rrëmbyer” biletën Danimarkës.
Me këto skuadra të kualifikuara, Botërori 2026 premton spektakël, rivalitet dhe histori të reja në futbollin ndërkombëtar. Shpresat janë të mëdha që këtij pazëlli t’i bashkohen Shqipëria dhe Kosova, nëpërmjet fazës “play off” që do të zhvillohet në mars.
