Një qytetar nga zona e Pukës i është drejtuar redaksisë së Piranjat News me një denoncim për zjarret që prej kat&...
AKTUALITET
79 ditë rezistencë, Hasimja: Protesta ka krijuar një sjellje të re elektorale
PiranjatPërditësimi i fundit 17 Gusht 2026, 15:47
Ndërsa protesta kundër qeverisë ka hyrë në ditën e 79-të, politologu Ermal Hasimja e sheh lëvizjen qytetare si një zhvillim që mund të lërë gjurmë përtej protestave në rrugë.
Në një intervistë për News24, Hasimja tha se një nga efektet më të rëndësishme të protestës është thyerja e frikës. Sipas tij, në shesh kanë nisur të shfaqen edhe punonjës të administratës, pavarësisht pasojave që mund të kenë.
Hasimja shton se protesta nuk ka prodhuar vetëm pakënaqësi ndaj qeverisë, por po krijon një sjellje të re elektorale, veçanërisht te të rinjtë.
“E para ky element i bashkimit. Shqiptarët po ndihen të bashkuar përtej partive politike, polarizimit që ka krijuar qeveria me politikat e veta. Edhe me ligjërimin sorrat, korbat etj. Ka thyer elementin e frikës. Sot shikon në protestë edhe njerëz të administratës, pavarësisht pasojave që mund të kenë.
Nga ana tjetër mendoj se protesta ka shërbyer si një lloj shkollë vere demokracie. Ata të rinj që kanë ardhur kanë qenë të tërhequr nga politika. Kanë votuar në linjën e prindërve ose nuk kanë votuar fare. Është e sigurt se ata që kanë dalë në protestë është e vështirë që të votojnë më për Rilindjen.
Protesta ka formësuar një qëndrim të caktuar politik që shkon përtej qëndrimit të pakënaqësisë së Zvërnecit dhe probleme të tjera dhe maksimizohet deri tek formimi i sjelljes elektorale. Mendoj se këta njerëz do të votojnë kundër qeverisjes”, tha Hasimja.
Duke folur për opozitën, politologu vlerësoi se ajo tashmë e ka kuptuar se protesta qytetare mund të jetë një faktor i rëndësishëm kundër qeverisë, edhe pse njëkohësisht e vendos atë përballë nevojës për reflektim.
“Opozita ka kuptuar se protesta ka qenë një aleat i papritur, ndoshta i vështirë sepse ka vënë në pikëpyetje edhe vetë natyrën dhe karakterin e opozitës. Po ta shohësh nga pikëpamja jonë që nuk jemi pjesë e opozitës, mendoj se është gjë pozitive se e ka detyruar opozitën që të reflektojë”, shtoi ai.
