Gjykata e Tiranës ka caktuar masën e sigurisë detyrim paraqitjeje për 18 persona të arrestuar gjatë protestave në Tiran&eum...
AKTUALITET
Akuzohet për përndjekje dhe ngacmim seksual ndaj dy të miturve, Prokuroria e Elbasanit ngre grup të posaçëm hetimor për çështjen e mësuesit Fatmir Hoxha
n.fPërditësimi i fundit 17 Prill 2025, 19:34
LIBRAZHD- Një mësues ka rënë në prangat e policisë ditën e sotme si i akuzuar për përndjekje dhe ngacmim seksual ndaj dy të miturave. Mësuesi Fatmir Hoxha ishte kallëzuar dy herë të tjera më parë nga familjarët e dy të miturave, 13 dhe 14 vjeçe, të cilat pretendojnë se mësuesi i përndiqte shpeshherë dhe i ngacmonte seksualisht.
Prokuroria e Elbasan ka nisur hetimet ndaj mësuesit për veprën penale “Ngacmimi seksual” kundër fëmijëve. Ngjarjen e ka denoncuar drejtori i shkollës pasi një koleg tjetër ka parë mësuesin të kryejë veprimet të papërshtatshme me fëmijët në fjalë dhe prekje.
Për 55-vjeçarin, komuniteti kishte kërkuar largimin e menjëhershëm nga puna për shkak të këtyre sjelljeve te pahijshme. Pasi ndaj mësuesit është bërë kallëzimi i fundit në polici, ka tentuar të largohej nga vendi me avion por është marrë masa e ndalimit të menjëhershëm në aeroportin e Rinasit.
Hoxha është mësues i lëndëve “Histori-Gjeografi në shkollën “Ali Hana”, në fshatin Skënderbej, Prrenjas. Sipas njoftimit të prokurorisë mësuesi kishte ngacmuar seksualisht dy nxënëse të tij në klasën e VIII dhe në klasën e IX. Pas marrjes së informacionit, janë kryer menjëherë veprimet e para procedurale dhe hetimore nën drejtimin e prokurorit të çështjes, ku janë pyetur punonjës të shkollës ku dyshohet se është kryer vepra penale, prindër të viktimave të mitura, janë administruar përmes këqyrjes dokumente të mbajtura nga ana e stafit administrativ të shkollës në fjalë, si dhe vendimi për pezullimin nga detyra të mësuesit.
Si rezultat i këtyre veprimeve paraprake hetimore është krijuar dyshimi se Hoxha, duke shfrytëzuar detyrën e tij si mësues dhe faktin që në klasat e viktimave të mitura nuk ka patur shumë nxënës të tjerë, pasi krijonte situata ku ato të gjendeshin vetëm, ka kryer sjellje me natyrë ngacmuese seksuale kundrejt tyre.
Në kushtet e dyshimeve të krijuara si më lart, është bërë shpallja në kërkim e tij i cili nuk është gjetur në ambientet e banesës së tij. Hoxha është kapur dje në Pikën e Kalimit Kufitar Rinas, teksa është paraqitur për të dalë nga territorit të Shqipërisë për në Austri, përmes një linje ajrore. Duke vlerësuar rrezikun e ikjes së tij, është proceduar me ndalimin e tij.
Lidhur me rastin, nga ana e Prokurorisë pranë Gjykatës së Shkallës së Parë të Juridiksionit të Përgjithshëm Elbasan është ngritur një grup i posaçëm hetimor i përbërë nga prokurori dhe OPGJ të specializuar për çështje me viktima të mitur, si dhe janë njoftuar njësitë përgjegjëse për mbrojtjen e fëmijëve dhe strukturat shtetërorë përgjegjëse. Njëkohësisht, po vijohet me thellimin e hetimeve për zbardhjen e plotë të faktit penal dhe identifikimin e rasteve të tjera potenciale në të njëjtën shkollë të kryer nga personi nën hetim Fatmir Hoxha. Grupi i posaçëm hetimor përbëhet nga prokurori Gëzim Spahiu.
